Indian health ministry chuan an ram chhunga Covid-19 laka invenna late chhinchhiahna, Covid vaccination database-a mi mal chanchin an chhinchhiate a put nia sawina awm a pha.
Thuchhuah an siamah ‘hetiang titi awm hi behchhan fumfe nei lo leh thil nihphung lo lutuk’ tiin a tar lang a. Hetih rual hian chhui chian tura tihna thupek erawh chhuah a ni tih a tar lang.
Health ministry-in CoWin database a neihah hian Indian maktaduai tel nihna chi hrang hrang dah tel a ni.
Health ministry-in an data-te chu a put lo nia an sawi laiin sorkar hnuai thova ministry dangin a put theih thu an sawi a, an inhnial.
Electronics & Technology Minister Rajeev Chandrasekhar chuan Twitter-a thuchhuah a siamah thil sawi awm chu chhui mek a nih tawh thu leh CoWin data chu a put ru palh thei tih a sawi bawk.
An chhinchhiahna pui ber chu Telegram messaging service nena thlun zawm a nih thu leh ‘CoWin app-a thil awmte hi phone number nena thlun zawm a ni a, put thei a ni’ tiin a sawi.
Chandrasekhar-a hian Indian Computer Emergency Response Team (IndianCert)-in an chhui nghal mek tih a sawi a. A hma lamin Covid vaccine database-a Indian maktaduai tam takte data chu ‘khawih leh ruk’ niin heng hi hmuh let vek a ni tawh thung tih a sawi bawk.
June, 2021 khan CoWin portal hi khawih chingpen (hack) niin Indian maktaduai 150 zette nihna kimchang lak chhuah a ni tih sawi a lo awm tawh a. Hemi tum pawh hian sorkar chuan a pha.
Nikum January khan hetiang bawk hian data khawih a awm tih sawi a awm leh a, hemi tum hian National Health Authority chief Ram Sewak Sharma chuan database hi ‘a him a, khawih a ni lo’ tih a sawi tawh bawk.