Ecuadorean pitar, a thi tia damdawi thiamten an puan tawh, vui tura kuanga an dah vek tawh chu a la thaw tih hmuh a ni a, enkawl zui mek a ni.
Babahoyo khawpui damdawi ina thawk doctor chuan kum 76 mi, Bella Montoya-i hi stroke a neih hnuah a thi niin a puang.
Kuangah dah a ni a, vui turin ruahmanna pawh siam niin chhung leh khatte pawh an inpun khawm.
Darkar nga dawn a liam hnua a thawmhnaw thlak tuma kuang an hawng chu a lo la thaw tih an hmu ta chauh a ni.
“Ka nu hian a kut a rawn tiche a, a rawn mek a, a ka a ang zui a, harsa takin a lo la thaw a ni,” tiin a fapa, Gilbert Balberán chuan a nu dama an hmuh leh lai a sawi.
A awm ve zinga pakhatin video a lak darh zuiah chuan kuangah hian harsa ti takin a thaw a, ambulance an ko a thleng thei mai lo phun thawm pawh a awm.
Rei vak lo hnuah firefighter-te thlengin Bella Montoya-i chu kuang atanga la chhuakin hlangin an zawn zui a, a thi tia an puanna damdawi inah bawk an dah let leh ta a ni.
A fapa chuan Ecuadorean chanchinbute hnenah intensive care-ah a awm a, biak a hria tih a sawi.
“Oxygen pek a ni a, a lung a tha a. Doctor-in a kuta a vih pawhin a hria a, zawi zawiin a harh hret hret zel niin min hrilh,” tiin a sawi niin El Universo chanchinbu chuan a tar lang.
Ecuador-a health ministry chuan he thil thleng chhui chiangtu tur committee a din nghal.
Balberán-a hian a nu hi zing dar 9:00 velah damdawi inah an dah lut tih a sawi a, “Chhun lai velah doctor-in a thi tih min hrilh ta a ni,” a ti.
Death certificate an pek chhuahah a stroke hnuah cardiopulmonary arrest vangin a thi tih an tar lang.
Bella Montoya-i chauh hi thi tih puan hnua dam leh a ni lo va. February khan US-a New York-ah pitar kum 82 chu vuina ina a awm laiin a thaw leh tih hmuh a ni a. A hma darkar thum velah nursing home-a a awmnaah a thi tia puan a ni.