United States President Joe Biden chuan tuna China ramin a kalpui mek aia changtlung zawkin US thlawp Build Back Better World (B3W) kalpui a duhthu a sawi.
China ramin a kalpui mek hi Belt & Road Initiative (BRI) tih a ni a, hei hian ram hrang hrangte chu an rel, kawng leh lawngchawlh hmun tihchangtlunna atan sum leh paiin tanpuina an pe thin.
China kalphungah hian a puih ramte hian China lakah leiba tam tak an neih phah thin avangin sawisel a tawk nasa.
English county-a Cornwall hmuna summit hmang, G7 hruaitute chuan hemi chungchangah hian thuchhuah siamin an thawhpui turte leh anmahni inkarah tih tak takna, a tha thei ang ber duhna leh langtlang taka hmalakpui an tiam thu an tar lang.
China ram hmalakna hi US hian an haw fal leh bik hle a, ram pahnih inkarah palaina hmanga leiba insiamsak tumna tiin a sawi.
China ram hian kum 2013 khan BRI hi President Xi Jinping-a’n hawngin an kalpui tan tawh a. Ram 100 chuang nen hemi project hnuaiah hian rel, kawng, lawngchawlhna leh hmun pawimawh sakna turin inremna an siam.
Mi thenkhat chuan Xi-a’n hmanlai Silk Road ang khan China hamthatna turin khawvel hmun pawimawh pawh thei vek inkalpawhna din a tumna niin an sawi.
Heng bakah hian khawvel ram hausa intelkhawm pasarih awmna, G7 hian hun lo kal leh zel tura khawvel pumin harsatna inang a ruala a hmachhawn thin (pandemic) chu a thlen tawh lohna tura invenna siam an intiam bawk.