Sorkar laipui chuan Indian Air Force-ten ram venhimna lam atana an mamawh, indo thlawhna 200 tal neih tumin hma a la mek zel tih defence secretary Ajay Kumar chuan a sawi.
HAL-in an siam tur, LCA Tejas Mark 1 A advanced fighter jet 83 atan pawh contract siam tawh niin hei hi tihfel thuai a ni dawn tih Kumar chuan a sawi.
Heng LCA siamna tur bakah hian Expression of Interest (EOI) chu tih dan thin anga tihchhuah niin thlawhna dang 110 neih belhna tur a ni dawn a, hei hi Request for Proposal (RFP)-in ruahmanna a siam angin a siamtu, leitirtu tur zawn a nih thu defence secretary chuan a sawi.
“Indo thlawhna thar 200 neih belh theihna tur a ni dawn a, heng thil hi kalpui mek a ni,” a ti a. “Light Combat Aircraft (LCA) Mark 1 A 83 siamtirna tura contract hi tihfel hnaih a ni a, hei hi rang taka kan mamawh a ni,” a ti.