France forward Kylian Mbappe chuan nikum July khan Paris St-Germain chu kum 2024 thleng an hnena contract a neih chu a ziah belh dawn lo tih a hriattir tawh thu a sawi.
Kum 24 mi hian season tharah a contract hi a hmang zo dawn a, kum khat ziah belh theihna awm chu a hmang dawn lo tih a sawi nawn. Tunhnaiah PSG hnenah a thutlukna hi ziakin a hriattir nawn leh a ni.
Mbappe hian hemi chungchang hi sawifiahin nikum July 15 khan PSG hi a thutlukna hriattir an nih tawh thu a sawi a. Ziak a a hriattir lehna hi a thutlukna nemnghehna chauh a nih thu a sawi.
Hetiang a nih avang hian PSG hian Mbappe hi free transfer a chhuahtir an duh lova, hei vang hian an club chanchin a goal khung hnem ber hi kuminah hralh mai an phal.
Mbappe aiawhte hian nikum lama PSG an hriattir hnuah contract pawhsei lam engmah inbiakna an nei lova, tunhnaiah lehkha an thehluh hnuah chauh a hmalam hun chungchang hi sawi a nih thu an sawi tel.
Mbappe hian kum 2017 khan AS Monaco atangin PSG hi a zawm a. A tirah loan a zawm phawtin a hnuah Euro maktaduai 180 in a nghet in a zawm. An tan game 260 khel tawhin goal 212 a khung tawh.
Hralh a nih theih tur thu sawi a nih hnuah Spanish club Real Madrid hming a ri nghal a. Nikum khan lalut tura ngaih an nih tawh hnuah Mbappe hian Paris a cham a thlang.
Khawiah te nge a kal theih?
Real Madrid hian striker Karim Benzema an chhuahtir avangin tlarhma a khel tur an mamawh a, England striker Harry Kane nen sawizawm an ni.
England midfielder Jude Bellingham an lakluh bawk avangin Mbappe hi an lalut tel thei ang em tih zawhna a awm.
Saudi Arabia sawirik an ni a, anni lam hian a sum lam tlin dawn mahse kum 24 mi, a vanglai la hmang tur hi an thlem chhuak thei dawn em tih hriat a ni lo.
English club zingah Manchester United, Chelsea leh Liverpool te pawh sawi rik an lo ni vek tawh a. Hetihlai hian anni hi an che dawn a nih chuan an squad insiksawi dan tura ruahmanna an neih an tihdanglam ve viau a ngai dawn niin a lang.