Aizawl: MNF Unit Hlimen buatsaihin nimin khan MNF party zawm thar lawm luhna hun hman a ni a. He hun hi Aizawl South III bialtu MLA Prof. F. Lalnunmawia’n a hmanpui a, party lian leh ngelnghet MNF-in a ni telin hma a sawn zel niin a sawi.
Mi thar lawm luh inkhawm, Joshua Zotea ina neihah bialtu MLA chuan mi thenkhatin MNF sorkar chu engmah thawk lo, chhe lai let der angin sawi thin mah se, MNF sorkar hnathawh thatzia hmuin MNF zawm thar an awm zel tih a sawi.
Prof F. Lalnunmawia chuan MNF chu hruaitu tha leh nghet, leadership nei tha leh party organisation tha tak hnuaiah an awm chu an vannei bik hle tih sawiin, “Kan elpui party dangte erawh MNF anga leadership nei tha leh organisation nghet an neih ve loh avangin an buai hle a. An la buai dawn chauh niin a lang. Party lian leh ngelnghet MNF hian a ni telin hma a sawn zel a ni,” a ti.
MNF Hlimen Unit President J Lalhlimpuia kaihhruai inkhawmah hian MNF adviser ni bawk hian an party zawm tharte chu a lawm lut a ni.
Thawhtanni tlai khan Prof F Lalnunmawia hian a bial chhung, Hlimen YMA Hall-a awm mek Manipur atanga raltlante a tlawh a. Raltlan mi 20 awmin Hlimen YMA-ten lo buaipuiin khawtlangah vehburte an khawnsak a. Aizawl South III bialtu MLA hian raltlante hi buhfai, alu leh dal a pe bawk.