National Medical Commission (NMC)-in Zoram Medical College (ZMC), Falkawn chu kum khat atan recognition (pawmpuina) a pe tih nimin khan ZMC hotute an hriattir.
ZMC hotuten The Zozam Times an hrilh danin NMC hian kumin January thla khan ZMC hi an endik a, tlakchham thenkhat la awmte chu tipuitling tura hrilhin, chungte chu hun rei lote hnuah tipuitling nghalin, NMC-ah report pawh theh luh ran a ni.
Nimin khan NMC hian virtual hearing an nei leh a, ZMC chu kum khat atan recognition pek an nih thu an puang ta a. NMC hian an endik chhunzawm zel ang a, recognition hi kum khata aia tam an pe chhunzawm zel tura ngaih a ni.
Tunah hian ZMC ah hian MBBS zirlai 488 awmin hmeichhia 270 leh mipa 218 an ni a, zirtirtu 144 leh non teaching staff 554 an awm bawk.
MBBS batch hmasa berte pawh internship an tihphalsak an ni a, hengte hi an zawh hnuah kum 2024-ah degree neiin an zo dawn a ni.