Press accreditation card sem chhuahna hun nimina neihah I&PR Minister Lalruatkima chuan card hian tangkaina tam tak Mizoram chhung leh pawnah a nei tih sawiin, chutih ruala mawhphurna a ken telte chu hre reng turin chanchinbumite a chah.
I&PR Auditorium-a press accreditation card semchhuahna hunah Lalruatkima chuan sorkarin chanchinbu mite a dah pawimawh hle tih a sawi a. Accredited journalist ni tura State Press Accreditation Committee-in uluk taka a thlanchhuahten accreditation card an dawng thei chu a lawmpui thu a sawi a. Journalist-te chu an thuziak leh thu puanzarin ram inrelbawlna thlenga nghawng a neih theih avangin an pawimawhna hre thar tur leh an thuziakte uluk lehzuala endik thin turin a chah.
Lalruatkima hian journalist-te tan sorkarin theihtawp a chhuah thin thu a sawi a. Journalist Pension Scheme pawh tihpuitlin thuai a nih tur thu sawiin, tun dinhmunah Journalist Welfare Fund atan Rs. nuai 20 dah a ni a, press tour vawi nga neih tawh niin parliament-a training nei turin chanchinbu mite chu batch hnih lai tirh a nih tawh thu a sawi.
I&PR minister hian information technology-in khawvel a rûn mek avangin technology chhuak tharte um pha tur chuan mahni insiam rem a ngaih chang a awm fo a, hmanraw thar hmang thiam zel turin chanchinbu mite pawh mahni intuaihriam thiam turin a chah a. Social media hman sualna kawngah accredited journalist-te chu fimkhur tura ngenin, ‘journalist ethics’ vawng nung reng tur leh chanchinbu mite chu mipuite hnena chanchin thar thlentu leh mipui kaihruaitu pawimawh tak an ni tiin an mawhphurnate hlen a, mipui hnena chanchin dik tak leh belhchian dawl chauh puang darh thin turin a ngen.
MJA Gen. Hqrs. President C. Lalrambuatsaiha pawhin press accreditation card sem chhuah a nih theihna tura minister leh I&PR department-te hmalaknaah lawmthu a sawi a, minister hnen atang ngeia accreditation card an dawng thei chu thil chhinchhiah tlak leh hlu tak a nih thu a sawi.
Accreditation card sem chhuah inkhawm hi I&PR Director C. Lalnunkima’n kaihruaiin F. Lalfakzuala, Joint Director, I&PR chuan lawmthu sawiin hun a khar.
Press accreditation Card hi kum hnih chhung nung tur a ni a. Tun tumah hian Mizoram district hrang hranga atangin journalist 140 hnenah pek a ni a. Aizawl district bikah chuan journalist 51 hnenah pek a ni.