Mizorama team hlawhtling Thutak Nunpuitu Team-in an la puitlin loh trophy lak tumin kawng dik an zawh mek a, Thawhtanni zan Tata SK 712 Pro Volleyball League-ah 3-1-in Tuichangral an hneh.
R Dengthuama Indoor Stadium, Mualpuiah set hmasa ber hloh mahse ropui takin an kir leh a, Vanlaltanchhana’n chuan vawi nga ti sual chungin point 31 a hmu a, 28-30, 25-15, 25-18, 29-27-in TNT an chak.
Nikum khan a vawi hnih nan Pro Volleyball final khelin a hma ang bawkin harsatna an tawk a, Durtlang North an ngam lo. TNT-in inrintawkna sang zawk nen bul an tan a, league an khelh hmasak berah Durtlang North laka an tlawmna an chhang let nghal.
El tham Tuichangral hmaah team fei leh nghet, thawhhona nei tha an nihzia lantirin an khelhpuite aiin ho taka point paih an nei tlem a, chu chu an hmasawnna leh danglamna a ni zel.
Set khatna inchuhin vawi nga an deuce hnuah 29-28-in TNT an hniam a, D3 Business Player of the Match lawmman dawngtu Vanlaltanchhana’n vaw sualin 2018-a final lut Tuichangral an tlang.
An boruak a hniam laiin TNT zawkin inkhel an tidanglam zui a, Kawnpui tlangval Valbuanga team fuih phurin harsa lo takin set an la zawn. Net bula lehlam hlap dangtu ber Zosangzuala’n a hlutna a lantir bawk a, an inkhel chhungin point khat chiah hlohin 13 a thawk chhuak.
Vuak tlak an harsat avanga an tlak hniam hnuah Tuichangral insiam thar ve lehin Vinod Khatkar chuan a hlap tla a, 24-23-in hma an hruai. Set lina la thei turin Khawhai spiker Saidingpuia Sailo chuan hun tha a nei a, line pawnah a vuak chhuak.
Boruak sosang tak hnuaiah setter tawn hriat nei Lalliankima’n chiai lo takin inkhel a thunun a, 27-27 a nih hnuah Laldinchhunga’n vawi hnih a vaw tla zawn. Set khatnaa an chet sual tawhna siam tha nghalin table chung berah TNT an inhlangkai.
TNT tan Dinchhunga’n vawi 14 vaw tlain point ruk a hloh a, Sadraka Fanai chuan 12 hmuin tum thum a tisual ve thung. Tuichangral innghahna Vinod chuan point 27 thawk chhuak mahse 14 a hloh a, Hunthar an hneh loh tuma hliam vanga lak chhuah ngai Saitea’n tum 20 hlap tlain 12 a paih bawk a ni.
Biak In chhunga inkhel mai thin TNT-in rawngbawlna peng khata an hman mek volleyball-ah sulhnu an nghah hle laiin, trophy an dah khawmnaah Mizoram inelna sang ber Pro Volleyball a tel ve lo.
Mizo hlanga champion hmasa ber nih tumin an bei mek a, Nilaini zanah rin hlawh zawk ni chungin kai thar Tuipuiral nen an inkhel ang. A tuk zanah Tuichangralin anni ang bawkah an khelh hmasak vawi hniha tlawm ve ve Durtlang North an hmachhawn dawn a ni.
BVT an chak
Bethlehem Vengthlang in an mamawh hnehna an chang a, Thawhlehni tlai Tata SK 712 Pro Volleyball League hmeichhe inelnaah 3-0-in Durtlang lakah an chak.
R Dengthuama Indoor Stadium, Mualpuiah Elisian Medai a inlar thar leh a, point 25 hmuin tum nga hloh mah se D3 Business Player of the Match lawmman a dawng a, 25-7, 25-12, 25-20-in Bethlehem Vengthlang a chakpui.
Kanan leh Luangmual laka an tlawm zawn hnuah champion lai Bethlehem Vengthlang an derthawng na a, Durtlang lakah hneh takin inkhel an thunun nghal a, player-ten nuam ti takin an khel.
Set hnih an hloh zawn hnuah Lalpekhlui’n kum lama naupang rual awm khawmna Durtlang nawr kalin 13-8-in hma an hruai hman. Mahse, Bethlehem Vengthlangin bei letin point kua an hmu zawn a, an lehpelh hnuah hawi kir tawh lovin an tlang.