Korean actress hriathlawh Park Soo Ryun chu kum 29 mi lek niin leilawn atanga a tlak hnu-ah a thi zui a, a taksa peng te hi a chhungte’n mamawh tan an ‘donate’ nghal.
Snowdrop atanga hriatlar hi June 11 khan a chesual palh a, Damdawi In ah kalpui nghal mah se, doctor te chuan chhan theih a nih tawh loh thu a chhungte an lo hrilh.
Larna leh hmingthanna in a hual vel kara boral ta taksa peng te hi a chhungte chuan donate turin thutlukna an siam. A nu chuan, “A thluak chiah a che thei lova, a lung a tha reng a, mamawh ngawih ngawih tan a tangkai hle kan beisei. A nu leh pa nihna angin, midangte’n damna leh nun thar neih nan an lo hmang thei a nih chuan thlamuang takin kan awm thei dawn, tihna a ni a, ngaihngam takin kan awm thei bawk ang,” a ti.
Park Soo Ryun hian 2018 khan ‘il tenore’ film hmangin lemchan khawvel a luhchilh a, musical film hmuhnawm tak tak- Finding Kim Jong Wook, Passing Through Love, Siddhartha, leh The Day We Loved-ah te mite hriathlawh khawpin a inlan.
‘Snowdrop’ film-ah langsar lutuk lem lovin inlan zui mah se, a thawhpui leh chanpuite’n an ngaihlu hle thung a, film an buaipui chhung zawngin an ngaihsak a, an buaipui a, an enkawl that em vangin Park Soo Ryun pawh hian a thawhpuite nen an thlalak dahchhuakin, an chungah a lawmzia te, thawhpui nuam tak an nihna te leh project dangah te pawh thawhho zel a beisei thu a ziak chhuak nghe nghe.