Aizawl : Lunglei North bialtu MLA, MYC Chairman ni bawk Dr. Vanlaltanpuia’n Zotlang Higher Secondary School, Lunglei building thar chu nimin khan a hawng.
Vanlaltanpuia chuan Zotlang Higher Secondary School building thar tha tak hawn theiha ruahman fel ani chu lawmawm a tih thu sawiin, School Education Minister Lalchhandama Ralte chungah lawmthu a sawi a. Khawvel changkang chho zelah Mizo thalaite pawh kawng hrang hrangah hma kan sawn nasa hle a ni, tiin, incheina leh pawnlam ringawta changkang lova, zirna leh thiamna, mahni talent hman tangkaina kawngah te pawh hma sawn zela, state dang thalaite el pha thei tura tan kan lak a tul a ni, a ti.
Zirna lamah state dangte nen khaikhinin hmasawnna tur nasa tak kan nei a ni, tiin Vanlaltanpuia chuan kan state leh kan hnam hmasawn zelna turin zirlaite chu thahnemngaia theihtawp chhuah turin a fuih a. Mimal tan a tha a, chhungkaw tan, khawtlang tan, ram leh hnam tan zirna tluka tha hi a awm lo a ni tiin, Zirtirtute pawhin zirlaite career in sial thiam a ngai a, zirlaite pawhin thahnemngai taka inpumpekna nena in zir a ngai a ni, a ti bawk.