All Assam Manipuri Youths’ Association (AAMYA) chuan Manipur-a Kuki-Zo-in inrelbawlna hran an ngiat a thlawpna hnukdawk turin Mizo National Front (MNF) kaihhruai Mizoram sorkar an vau.
Thuchhuah an siamah AAMYA chuan Manipur tual chhung buaina thleng meka Mizoram sorkarin Kuki-Zo-in Manipur-a inrelbawlna hran a thlawpna hnukdawk tura vauin, June 14, 2023 atanga chhiara ni thum chhunga a thlawpna a hnukdawk lo a nih chuan tunhmaa la thleng ngai lo Mizoram ramri zirchianga nasa zawka hmalakna lian tham tak kalpui thuai an tum thu an tar lang.
AAMYA chuan Manipur-a Kuki-Zo mipuite tana inrelbawlna hran nei tura thurawn leh thlawpna hi thil awm lo ni lo mah se, India tan a hlauhawm avangin Manipur tual chhung buaina thlengah remna leh muanna a awm theih nan Mizoramin pawimawhna thuk tak a nei tih an tar lang.
Mizoramin Churachandpur mipuite tana ei leh ina tanpuina kawngah lawmawm an tih thu an leh he buaina thleng chungchangah remna siamtu ni turin Mizoram an ngen bawk.
AAMYA chuan an ngenna hi Mizoramin a bengkhawn lo a nih chuan Meitei leh Kuki inkarah indona a awm chhunzawm reng dawn a, Meitei ho hi an inhawr khawma an inpeih tak tak hunah chuan Kuki ho hian an dawl rei dawn lo a. Mahse, Kuki leh Meitei tam tak nunna chan an awm dawn a. Chuvangin, Mizoram chief minister hian chanvo pawimawh tak neiin a ngaihtuah fim leh fing tak a hmang a, Manipur tual chhung buaina hi tipunlun lo zawnga hma la turin an ngen tih an tar lang.