Myanmar ram hruaitu thin, Aung San Suu Kyi chu sipaiten a sorkar an paih thlak a nih hnuah dan a bawhchhiaa an puhna chungchanga a thubuai chu ngaihtuah mek zel a ni.
Suu Kyi-i hi phalna nei lova walkie-talkie kawl leh Covid-19 inkhuahkhirhna bawhchhiaa puh a ni.
A chungthu an ngaihtuah mekah hian an puhna dang, ei ru leh official secrets act a bawhchhia nia an puhna pawh ngaihtuah zui a ni dawn.
Mihring dikna chanvo humhalhtute chuan Suu Kyi-i chungthu rel a ni hi an dem hle a, nakin zela an ram sipai sorkarin inthlan a chuh theih tawh lohna tura an tih niin an chhal.
Kum 75 mi, Suu Kyi-i hi February 1-a sipaiten mipui sorkar an paih thlak atang khan a chenna inah hran a ni a. Hemi hnuah hian court-a a inlan zeuh zeuh bak hmuh tur a awm meuh tawh lo.
Nimina court-a a inlan hian a lawyer-te nen thuhretuten an khinna hrang hrangte chu ngaihthlak a ni a. Hren a nih atang hian dan hre mite hi nen hian hmaichhana an inkawm hi vawi hnih chiah la phalsak an ni.
An puhna dang, ram phatsan leh tibuai zawnga chea an puhna chu ngaihtuah a ni dawn bawk a. He thubuai bikah ringawt pawh hian thiam loh a chang a nih chuan kum 14 lai tang thei tur a ni.
Kar hmasa khan ei ruk thubuai siamsak a ni bawk a, thamna atan $600,000 leh rangkachak kg 11 vel a dawng nia puh a ni.
A lawyer Khin Maung Zaw chuan, “Phat ruah lohvin he ram atanga hnawh bo a nih theih nana politics-a inphiarna avanga hetiang hi thleng a ni,” tiin AFP hnenah kar hmasa khan a sawi.
“Hetianga an puh chhiat chhan hi hnawh bo tumna a ni,” a ti.
February thlaa sipaiten mipui sorkar an paih thlak chhan hi nikum inthlana chakten chak danah fel lo tam tak a awm nia an sawi vang a ni.
A hranpaa inthlan chhuitute erawh chuan inthlan zalen leh dik tak kalpui a nih thu an sawi a, Suu Kyi-i puhna pawh politics thila inphiarna niin an sawi.
Sipai sorkar ding thar leh hi an ram chhungah mipuiin duh lohna an lantir nasa hle a. Sipaite hian hetiang dotute hi an bei let nasa hle a, chanchinbumi thlengin kut an thlak.
Nimin khan United States chanchinbumi, March thlaa -a man chu an puhna hlipin chhuah a ni a. Nathan Maung-a hian vawiin hian Myanmar a chhuahsan dawn niin a dan hre mite chuan an sawi.
Thil thleng viltu, Assistance Association for Political Prisoners (AAPP) chuan venhim hna thawktuten civil mi 800 chuang an that tawh a, mi 5,000 dawn an man tawh niin an sawi.