Genesis. 12;7 = Plural Galatia. 3;16 = Singular Sawifiahna ; Gen. 12;7 thu hi RSV leh KJV te chuan ‘decendants’ a hmang a, chu chu pakhat aia tam sawina a ni a, NIV chuan ‘Offspring’ tiin pakhat chauh sawina a rawn hmang ve leha, hei hi a dik hmel zawk a ni. A chhan chu Gal. 3;16 ‘…….meaning one person, who is Christ’ a ti a, chang 19-ah chuan ‘…….Untill the seed to whom the promise referred had come,’ ti a a rawn sawi leh vang a ni.
ARONA THIHNA TLANG KHAWIAH NGE ? Numbers. 20;22 = Hor tlang Deut. 10;6 = Mosera tlang Sawifiahna ; Kanaan ram pana an kal laiin Mosia leh Arona te chuan Lalpa lung an tih awih loh avangin Lalpa’n kanaan ramah luh a phallo a, Mosera-a an kal lai chuan Mosia chuan Arona chu Hor tlangah a hruai chho a, tichuan a thi ta a ni.
ABRAHAMA KOHCHHUAHNA HMUN ? Tirhkohte. 7;2 = Ur (Messapotamia ram) Genesis. 12;5 = Haran Sawifiahna ; Ur khuaa an awm laiin Lalpa’n a ko a, tichuan Haran atangin Lalpa kohna chhangin a kalchhuak ta thung a ni.
KELEBA PA HMING LEH HNAM HMING ; Numbers. 13;6 = Juda hnam Jephunea fapa Keleba Numbers. 32;12 = Kemiz mi Jephunea fapa Keleba I Chro. 2;18 = Hezrona fapa Keleba Sawifiahna ; Hezrona leh Jephunea te hi Juda hnam ve ve an ni a, ‘Kemiz mi’ tihna chhan bik hi chu Juda hnam chhung bik a mi, entirna atan chuan, Chhakchhuak hnam chhung bik ah pawh hualngo leh hualhang tih ang chi hi a nih a rinawm a ni. Keleba pa hmingah hi chuan I Chro. 2;18-a ‘Hezrona’ a rawn tihna chhan chu NIV Bible footnote -ah chuan ‘chi dang Keleba’ a ti a, chu chu a dikna chiah a ni. Mi thuhmun an ni lo a, hnam hrang daih an ni tihna a ni.
ZAKARIA PA HMING ENGE ? Zakaria.1;7 = Barakia Isaia. 8;2 = Jaberekia Sawifiahna ; Zakaria hmingpu hi 30 chuang an awm a, Johana pa hming pawh Zakaria tho bawk a ni. Nimahsela, mi thuhmun anni chuanglo. Chuvang chuan Zak. 1;7 thu a Zakaria pa hming leh Isaia 8;2 thu a Zakaria pa hming in anga lang te hi mi thuhmun nilo in mi hrang daih an ni. II Chro. 24;20-22 thuah Zakaria pa hming phei chu ‘Jehoida ’ daih a ni.
MOSIA DAN LAKNA TLANG HMING ? Malakia. 4;4 = Horeb tlang Exodus. 19,20 = Sinai tlang Sawifiahna ; Horeb tlang tih leh Sinai tlang tih te hi thil thumhmun, sawidan hrang mai a ni. TEV phei chuan Malakia. 4;4 thua ‘Horeb’ tih hi ‘Sinai’ tiin a sawi tho a ni.
Galatia. 6;2 thu leh Galatia. 6;5 thu hi inmillo ang deuhin alang thei a, 6;2 thuah hian ‘inritphurhte inchhawk tawn rawh u’ a ti a, 6;5 thuah hian ‘mitin mahni phur an phur theuh dawn si a’ a ti leh a, heng thute hi a inkalh lo a, kan harsatna (burdens) ah in dawm kang tura min ngenna a ni a, chuti anih lai chuan keimahni thawhchhuah theuh kan la seng dawn chungchang thu a sawina a ni.
Thufingte. 26;4,5 chhung thu a ‘Mi a chu a at dan angin chhang suh’ tih leh ‘Mi a chu a at dan azirin chhang rawh’ tih hi inkalh angin a lang a, TEV chuan ‘Mi a’ tiloin ‘Zawhna at thlak (silly Question)’ tiin a sawi thung a, chuti anih chuan ‘zawhna atthlak chu a atdan angin chhang suh………..zawhna a zawttu che chu a atdan a zirin chhang rawh …….’ tiin dah ila a dik thei ang.
HMUNSANG ABO EM ? I Lalte. 15;14 = Hmunsang a bo lo II Chro. 14;3 = Hmunsang a bo Sawifiahna ; A hmasain Asa pa hi I Lalte 15;1 ah hian ‘Abijama’ a ti a, II Chro. 14;1 ah chuan ‘Abija’ tiin a dah leh thung a, a tihsual palh a ni thei ang. Hmunsang hi Milem biakna hmun a nih avangin Asa’n a tichhia a, a tibo a, nimahsela, Israel ram atang chuan a bo kher lo a ni. A inkalh hran lo e.
AN HRIAIN AN HMU EM ? Tirhkohte. 9;7 = Aw an hria, mahse an hmu lo Tirhkohte. 22;9 = An hmua an hre lo Sawifiahna ; Hetiang hian i han sawifiah dawn teh ang ; – Aw hi chianglo ruaiin an hria ang a, a ri hre siin, enge a sawi tih hriat theih bawk si loh angin an hria an ngei anga, engmah an hmu theilo a ti bawk a, mihring niloin Eng chauh an hmuh vang a ni. Eng hmu chu thil hmu a ni tho alawm.
MOSIA A CHAK NGE CHAK LO ? Deut. 31;2 = Mosia a chak lo hle Deut. 34;7 = Mosia chu ala chak hle Sawifiahna ; Deut. 31;2 thuah hian Mosia hian Lalpa’n Kanaan ram thleng lo tura a tih avangin a rilru a hnual hle a nih a rinawm a ni. Chumi anih avang chuan chak lo angin a awm aniang tih pawh a rin theih nghal mai a, Deut. 34;7 ah hian ala chak hle si a, ama’n chaklo a intih mai mai vang a ni.
TAWNGKAM IN ANG LO ? Luka. 9;35 = Hei hi ka Fapa, ka thlana chu a ni, amathu ngai rawh u II Pet. 1;17 = Hei hi ka Fapa, ka lawm em em a chu a ni Sawifiahna ; RSV footnote-a ‘Ka thlan’ tih hi ziak dangah chuan ‘Ka duhtak’ tiin an ziak a ti a, tichuan,’Ka Fapa’ka duh tak, ka lawm em em a chu a ni. Ama thu ngai rawh u’ tiin dah ila a dik thei ang.
A INKALH EM ? Exo. 20;17 = Awt suh I Kor. 12;21 = Chak rawh u Sawifiahna ; Exo. 20;7 thu a mi hi Thusawm pek ami a ni a, I Kor. 12;31 a mi nen hi chuan sawi fin chi a ni lo a ni. Sawi fin pawh ni ila, a dik tho bawk. Chak rawh u a tih hi Hmangaihna a nih tlat a vangin. 14.SAKAWR AN THI EM ? Exo. 9;3 = Hri a leng nasa Exo. 14;9 = An thi si lo Sawifiahna ; Ranpul hri hi a leng nasa em em mai a, Exo. 14;9 ah an thih loh zia kan hmu leh a, a inkalh a ang viau a ni. Nimahsela, a inkarah hian hun engtia rei nge a tlak ang le ? Hemi chhung hian Sakawr hmantlak chu a awm hman leh tho lawng maw ?
KUM 25 NGE KUM 30 ZAWK ? Numbers. 4;3 = Kum 30 leh kum 50 inkar Numbers. 8;24 = Kum 25 leh kum 50 inkar Sawifiahna ; Hemi kum zat hi Inbiakna Puan In-a hnathawktu kum zat a ni a, Inbiakna Puan In-a hnathawk tur hian Puitling chin a ngaih a vangin Kum 25 chin hi Puitling ah an ngai ang a, chu chu an duhtui zia lantirna atan Kum 30 chin an ti a ni ang.
DAR BAN SAN ZAWNG ? I Lalte. 7;15 = Tawng 8 -a sang II Chro. 3;15 = Tawng 35-a sang Sawifiahna ; Mizo Bible-a ‘Tawng 8-a sang’ tih hi a tihsual a ni a, ‘Tawng 18’ tih tur zawk a ni. English Bible te chuan ‘Tawng 18’ tih vekin an ziak a, dik zawk a ngaih a ni.
SAKAWR IN ZAT ? I Lalte. 4;26 = 40,000 II Chro. 9;25 = 4,000 Sawifiahna ; I Lalte 4;26 a singli a tih hi tihsual palh zawk a ni a, a chhanchu a number hi an lo copy sual palh ang a, chhinchhiahna fel tak an neih siloh a vangin tihsual palh ni a rin a ni.
ISUA BAPTIS THU AH ; Joh. 3;22 = Isua’n a baptis Joh. 4;2 = Isua’n abaptis lo Sawifiahna ; Isua leh a zirtir te khan an rawngbawlna a piang ah a huhoin rawngbawlna an nei zel a, chung an rawngbawlna hrang hrang ah te chuan Isua chu a hotu ber a nih a vang in an thiltih apiangah chuan a hming putu ber a ni lo thei lo a, Chuvang chuan Isua baptis thu ah pawh hian a zirtirte khan baptis theihna (license) an neih vek avangin a tak tak ahchuan an ni khan an baptis ang a, chu chu Isua’n a hming alo pu mai tih na a ni ang.
PATHIAN HMUH THUAH ; Joh. 1;18 = Pathian an hmu lo Exo. 24;10 = Pathian an hmu Sawifiahna ; Thuthlung Thar huna Pathian an hmulo tih hi a dik a, tuma’n Pathian hmel chu an hmu tak tak thei lo a ni. Mosia pawh kha Pathian hmel hmu teuh ber tu a ni a, a tukhum lam ringawt a hmuh pawh khan ‘Ka hlauin ka khur nasa em em a ni’ a tihial a nih kha. Pathian hmel chu Lei mihring tan chuan hmuh ngam chi a ni lo reng a ni. Exo. 24;10 thua Pathian an hmu a tih pawh hi Lalpa’n a Vantirhkoh a tir thin a, chu chu Pa-thian angin an sawi thin a ni.
DAVIDA HMUN LEH RAN MAN ; II Samu. 24;24 = Sekel 50 I Chro. 21;25 = Sekel 600 Sawifiahna ; Sekel 50 hi hruihzawl man ani ang a, Sekel 600 hi chu Ran man ni awm tak a ni. Hetiang hian pawm mai ila a hahdam thlak ang. A pumpuia aman a pek hi Sekel 600 tih hi chu a chiang thung. (Hruihzawl leh Ran neitu hi Arauna nge Ornana tih hi hriatfiah a har khawp mai bawk. )
ISKARIOTA KAWCHHUNGA RAMHUAI LUH HUN ? Joh. 13;27 = Kalhlen Kut lain Luk. 22;3-7 = Kalhlen Kut hmain Sawifiahna ; Iskariota kawchhunga Ramhuai luh hun chungchangah hian sawi dan chi hnih te hi a inhlat loh hmel hle a ni. Kalhlen Kut hma deuh hratin a ni ang a, kalhlen Kut pawh chu a rawn thleng chawp chilh nghal mai bawk a ni ang.
ISUA VAN LAWNNA HMUN ; Tirhkohte.1;9-12 = Olivet tlang Luk. 24;50,51 = Bethani dai Sawifiahna ; Bethani daiah hian Olivet tlang hi a awm vang a ni. Thil thuhmun, sawi dan hrang mai chauh a ni e.
RIMTUI BAWM AWMNA HMUN ; Exo. 30;6-8 = Puanzar pawnah Heb. 9;4-9 = Puanzar chhungah Sawifiahna ; He lai thu hi inhnialna tichhuak tu pakhat a ni. Zawlnei hun lai zawng zawng khan Puanzar pawn ah an dah thin a, a khu chuan puanzar chhung, hmun thianghlim ber chu a ur thin a, Arona hian nitin va tih alh a ngai si a, Hmun thiang-hlim ber ah chuan nitin a luh theih si loh a, chuvang chuan Hmun thianghlim ber ah chuan he Rimtui halna bawm hi a awmtheilo hrim hrim a ni. Amaherawh chu Lal Solomona hunah kha chuan Hmun thianghlim ber kiangah an dah lut ta a, chu chu Hebrai ziaktu hian a rawn la chhuak a ni tih a chiang a ni.
HREMNAA THI ZAT ; Numbers. 25;9 = Thi zat 24,000 I Kor. 10;8 = Nikhatah mi 23,000 an thluhlum Sawifiahna ; Nikhatah mi 23,000 an tluhlum a, an vaiin mi 24,000 an tih tihna a ni. Nikhat ah chauh an thi lo tihna a nih chu.
DAVIDA SIPAI ZAT ; II Samu. 24;9 = Mi huaisen 80,000 I Chro. 21;2 = Khandaih keng 11,00,000 Sawifiahna ; Khandaih keng an nih a vang hian mi huaisen an ni vek kher lo tih a chiang reng a ni. Mi 300,000 (11,00,000 – 800,000) te hi chu Sipai satliah ve mai mai ang an nih duh hmel hle a ni..
ISUA PA (Josepha) PA HMING ? Mat.1;16 = Jakoba Luk. 3;23 = Helia Sawifiahna ; Mathaia hian Thlahtute a rawn tarlang thla diat diat a, a tawp berah chuan Isua pu chu Jakoba tiin a rawn dah ta a, Luka thung chuan Helia tiin a rawn dah ta tlat thung a ni. A chhanchu Mathaia hian Mipa (Josepha) lam a chhui a, Luka thung chuan Hmeichhe (Mari) lam a rawn chhui vang a ni. An vaiin Davida thlahte vek tho an ni.
TAM TLAK HUN CHHUNG ; II Samu. 24;13 = Kum 7 chhung I Chro. 21;12 = Kum 3 chhung Sawifiahna ; Kum thum chhung tam hi a tla a, kum 7 tia Samuela’n a ziak chhan hi hriat a ni lo. Hebrai ho ziak dan a ni.
AIGUPTA BAWIHA TAN HUNCHHUNG ; Gal. 3;17 = Kum 430 Tirhkohte. 7;6 = Kum 400 Genesis. 15;13 = Kum 400 Sawifiahna ; Kum 430 tih hi a chiah chiah a ni ang a, Kum 400 a tih erawh hi chu a sawi awlsamna atana tih anih a rinawm a ni. Mizo tawngkam tha angah ngaih mai theih a ni.
ISUA LOKAL LEH HUN ; Mat. 24;40 = Chhun Luk. 17;34 = Zan Sawifiahna ; Khawvel mum zia tilangtu a ni. Kan tana chhun hi khawthlang lam tan chuan zan a ni. Lal Isua lokal hunah pawh hian a then tan chuan chhun a ni ang a, a then tan chuan zan a ni thung dawn a ni.
JEHOIKINA KUM ZAT ; II Lalte. 24;8 = Kum 18 II Chro. 36;9 = Kum 8 Sawifiahna ; Jehoikina kum chungchang hi English Bible lam pawhin an sawi dan a in ang lo thluah hlawm mai a, apa Jehoikima kha kum 25 a nih in a lal a, Jerusalem -ah kum 11 chhung ro a rel a, (II Lalte. 23;36) heti anih chuan a fapa Jehoikina lal a lo nihin kum 18 a ni tih hi a dik zawk hmel hle.