Premier League club Brighton & Hove Albion chuan an club chanchin a player manto ber ni turin Brazil forward Joao Pedro chu Watford atangin an lalut.
Kum 21 mi hian Seagulls hnenah hian kum nga daih contract a ziak a. Brighton hian a lakluh nan Pound maktaduai 30 vel an seng.
Kum 2020 a Watford zawmtu Pedro an lakluh tur thu hi Brighton hian May 5 khan an puang tawh a. Nilaini atanga nipui player bazar a inhawn velah a insawnna an ti fel nghal a ni.
Brighton technical director David Weir chuan, “Joao hi hun rei tak chhung ata kan ngaihven a kan lo zirchian tawh a ni a. Europe atangin club hrang hrangte ngaihven a hlawh nasa hle.”
“Player naupang talent nei tha tak a ni a, goal khung thei leh goal awmna hre tak a ni. Kan forward player neihsate nen an thawhhona a tha hle ang.” tiin a sawi.
Brighton hian tun season-ah an club chanchin a vawikhatna atan Europe huap inelna an hmachhawn dawn a. Season liamta khan parukna niin Europa League khel turin Roberto de Zerbi hnuaiah an tling.
Striker a khel, a tul anga veilam sirah leh striker hnung chiahah pawh khel thei Pedro hi Fluminense atangin professional football a khel tan a. Watford in a professional match hmasa ber a khelh hma hian kum 2018 October thla khan lalut turin inremna an nei tawh.
Fluminense tan hian match 28 atangin goal sarih a khung a. Kum 2020 khan Watford hi zawmin an tan inelna hrang hrangah match 109 khel tawhin goal 24 a khung bakah midang goal khung tur vawi 9 a siamsak.
Tun season bikah tlarhmaah chhawr kual a ni nasa hle a. EFL Championship-ah match 35 khelin goal 11 a khung bakah assist vawi li a nei.
Brighton hian an squad tihchhah an tum zel a, Liverpool veteran James Milner pawh nizan khan lalut fel tura ngaih an ni.