St Joseph Higher Secondary School chuan nimin khan kumina HSSLC result tha an neih an lawm a, Chief Information Commissioner Lalnunmawia Chuaungo, IAS (Rtd) chuan khuallian niin a hmanpui a, zirlaite chu zirna ngai pawimawh hmasa ber turin a chah.
Vana pa Hall-a hun hmanah Lalnunmawia Chuaungo chuan, “Khawvel nuna zawm tur chu engkimah, zirna, eizawnna leh rinna ni se, kan kalna lamah lum chuan luma vawh chuan vawh law law tur a ni. Tumruhna leh tih hram hramna hi kan nunpui tlat tur a ni,” a ti.
Lalnunmawia Chuaungo chuan zirlaite chu an inchhir loh nan an thawh theih zawng zawngte thawka in chhungah engkim ti turin a chah a, “Zirna kan ngaipawimawh hmasa ber ang a, kohhran leh khawtlanga inhmannain zirna a tibuai tur a ni lo,” a ti.
Education tum ber sawiin, “Ram, khawtlang, mahni leh chhungkua tana chhenfakawm nih hu zirna tum ber a ni,” tiin a sawi bawk.
Central Service lama Mizote tlin kan harsat tak avanga zawhna tam tak awmah zirna mawhpuh a nih thin thute sawiin, zirna chu khawvel khawi hmunahmah sawiselbo a awm lo tih a sawi a. Sorkar lama a hnarkaituten ruahmanna an siam fel a ngai a. Chumi atan chuan rawtna thlen tam a ngai tiin, zirlai naupangte chu sorkara zirna thatna tur rawtna thlen ngam khawpa huaisen turin a chah.
St. Joseph HSS, Aizawl hian Class 11-12-ah hian Arts, Science leh Commerce neiin, a pathumah hian kumin result-ah Top Ten an nei a, Top ten 15 an nei tling a ni.