Aizawl: Kumin tin June 14 hi khawvel pumah World Blood Donor Day atan hman thin a ni a. He ni pualin Mizoramah pawh Mizoram State AIDS Control Society (MSACS) leh Association for Voluntary Blood Donation (AVBD) te buatsaihin nimin khan hun hman a ni.
Dawrpui Multipurpose Hall-a World Blood Donor Day puala hun hmanah Health Minister Dr R Lalthangliana chu khuallian niin, khawvel thiamnain a siam chhuah theih loh thisen hlu tak, a thlawna pek chu hmangaihna, lainatna lan chhuahna a ni a, a thlawna thisen pe thinte chu chawimawi an phu thu a sawi.
Dr R Lalthangliana chuan AVBD hmalakna avangin a thlawna damlote tan thisen pek pawimawhna hi mipui rilruah a tla na tial tial tih a sawi a. Thisen pek pawimawhna leh mi hrisel pangngai tan a hlauhawm lo tih thalaiten an hriat zau zelna turin zirlai kalkhawmte chu mi dangte tihhmuhtu ni turin a chah.
AVBD General Secretary Lalrinkima pawhin pawl hrang hrang hruaitute, zirlaite leh zirtirtuten thisen pek chungchangah ngaihtuahna seng sak chhunzawm a, thisen vawi khat a pe teuh lovin pek ngun/pek zin tum thar turin a ngen a. AVBD pawh hian kum tharah chuan thisen petute chawimawi dan thar a duan a tum thu leh June thla hi sorkar chuan ‘Remna ni’ pual a thisen pek rûnpui thlaah a puang tih a sawi bawk.
Additional Secretary Betsy Zothanpari Sailo kaihhruai inkhawmah hian health minister-in kum 2022-23 chhung kohhran, pawl, sikul leh mi mal thisen pe thate hnenah lawmman a hlan a ni.
Kum 2022 April – March 2023 inkar hian thisen unit 37419 Mizoram pumah pek a ni a. Mahni duhthu ngei a thisen pek (Voluntary Blood Donation) hi Unit 34252 a ni a. Individual donor in unit 10744 kan pe bawk a ni. VBD % hi 91.54% a ni.
2022-23 thisen pe tha lawmman dawngtute:
MIZORAM PUM Pek zat
- National Service Scheme 6,093
- K|P 4,993
- M|KP 2,372
RELIGIOUS CATEGORY
- Central K|P 3,745
- |KP Coordination, Aizawl 905
- Youth Evangelical Front 485
YMA CATEGORY
- Chanmari West Branch 213
- Aibawk Branch 142
- Dawrpui Vengthar Branch 134
NSS CATEGORY (COLLEGE) - NSS, PUC 857
- NSS, Hrangbana College 529
- NSS, Govt. Aizawl College 347
NSS CATEGORY (HSS)
- Synod HS School 207
- Zemabawk HS School 145
- Helen Lowry HSSchool 142
MISCELLANEOUS CATEGORY
- MNYF 142
- Mizo Chelsea Supporters 78
- MGYA 71
Kum 2022-23 chhunga thisen pek zawng zawng zat – Unit 37,419
(2021-22 chhunga pek zat unit 28,191 aiin unit 9,228 (32.73%)-in a tam zawk)
Voluntary blood donation zat – Unit 34,252 (91.54%)
Blood donation camp neih zat – 589
Blood donation camp-a thisen pek zat – Unit 23,508