Inkalpawhna kawng laih nghawng avangin tun lai hian Mizoram hmun hrang hranga mipui tui tlan luite chu tihthianghlim harsa khawpin a nu mek a, khaw thenkhatah chuan PHE department-in tui sem tur siak chhuah a tikhaihlak nasa hle.
The Zozam Times zawhna chhangin PHE department-a Engineer in Chief F Liantluanga chuan tun hnaiah khaw hrang hrang – Lunglei, Lawngtlai, Hnahthial, Tlabung, Khawzawl leh Saitual te tuia chawmtu luite chu a nu hle a, mihring in tlaka tihthianghlim harsa khawpa nu a nih thu a sawi a, hei vang hian tui pump chhuahte pawh a tlakhniam phah a, Saitualah phei chuan thla khat chuang PHE department-in tui an sem mumal thei tawh lo tih a sawi.
F Liantluanga chuan hetianga lui tui a nut chhan ber chu kawng laihna leivung paih mumal loh nghawng a nih thu a sawi a, tun dinhmunah chuan tui nu lutuk hi disaster a tling tawh a, “Chhiat kan tawk a ni ber tawh,” a ti a; heng luite hi a nu chho zel a nih chuan tui sem chhuah kawngah harsatna lian zawk thleng thei a nih thu a sawi bawk a ni.
Tun hnaia lui nu nasate hi Lunglei tui tlan, Tlawng hnar te, Hnathial tui tlan Tuichang te, Tlabung tui tlan Khawthlangtuipui te, Khawzawl tui tlan Tuichang leh Saitual tui tlan Tuivawl te a ni.
Tlabung mipuite tui tlan ber, Khawthlangtuipui chu a nut nasa avangin hian tui sem chhuahte pawh a mumal lo a, hei vang hian chhungkaw tam takin man chawiin tui an lei nasat phah a. Tlabung atanga thudawnnain a sawi danin chhungkaw tam tak, ruahtui an dawn khamkhawp lote chuan mi mal lirthei hmanga tui chawi chu hman atan leiin rinpui berah an hmang mek a, hetiang a nih avang hian tui hralh tur chawi thinte chu an indaih lo lek lek hial thin zawk.