- Ruata
India rama Japan company lar Toyota ina an MPV larpui ber Innova re-badged chu Maruti Suzuki leh Toyota thawhhona kal zelah Maruti Suzuki hmingin tihchhuah a ni veleh dawn a, July thla hian an hralh chhuah ṭan beisei a ni.
He MPV thar tur hi tun thla tawp chhoah a book tan theih hmel a. Invicto hi Maruti Suzuki company product portfolio-ah chuan MPV an neih pathumna a ni dawn a, MPV model man to ber a ni dawn bawk a, a man tur hi cheng nuai 20 a chuan hmel a ni. He premium, three-row MPV huanga lirthei thar tur hian MPV mai bakah SUV ngainatute a hip ngei a beiseiawm a. Grand Vitara ang bawkin Maruti MPV thar hi Toyota Bidadi plant-ah siam a ni dawn a ni.
Kan lo tarlan fo tawh angin Toyota leh Suzuki thawk dun hian an lirtheite hi intawmin, an company ve ve hming put tir siin an tichhuak thin a. Kan hmuh tawhah pawh Maruti Suzuki Baleno chu Toyota-ah chuan Glanza a ni a, Brezza pawh Toyota-ah chuan Urban Cruiser tih hming puin an tichhuak a. Tunah pawh a lirthei inang chiah siin Grand Vitara leh Hyryder-a awm leh a. Tuna Innova ang chiah Invicto lo chhuak tur pawh hi hetiang chiah hi a ni dawn a ni. Heng an thawhdunna hnuaia company hming ringawt thlak ho hi an lirthei a inang chiah chiah tihna a ni lo a, company te hian a company ta tih hriat tak turin engtin emaw a chhung leh pawnah an thuam danglam ve hlek hlek bawk a ni.
Automatic transmission chiah awm dawn
Toyota TNGA-C architecture nghahchhana duan tur Invicto hian 183bhp power pechhuak thei, 2.0L strong hybrid leh 173bhp power pechhuak thei, 2.0L petrol khawl te duhthlan tur a neih hmel a. A hmasa zawk hian e-CVT gearbox a hmang a, a hnuhnung zawk hian CVT automatic transmission a hmang thung a. Maruti Invicto hi manual transmission hmang a awm dawn lo a, automatic chauh duhthlan tur a awm dawn a, hei hi Maruti Suzuki lirthei model-a automatic transmission chauh awm hmasa ber a ni dawn a ni.
Design
A lenzawng lamah chuan Maruti MPV thar hi Innova Hycross nen a inang dawn a. Mahse, pawn lamah erawh chuan danglamna langsar tak tak kan hmu thung dawn a. A thlalak darh thar ber ber atanga a lan dan chuan he model hian trapezoidal grille a nei dawn a, chrome bar a nei dawn a, front bumper design thar kan hmu bawk ang a, LED DRL leh alloy wheel a nei dawn a ni.
A chhunglam
A chhungah hian tihdanglam a awm a beiseiawm lem lo a. Invicto hian 10.1-inch floating touchscreen infotainment system, wireless smartphone connectivity, digital instrument cluster, front ventilated seat, panoramic sunroof, 9-speaker JBL audio system, ambient lighting, 360 degree camera, automatic climate control leh ADAS (himna hmanraw changkang tak) te a neih hmel a. Passenger zawng zawng tan 3 point seat belt awmin airbag 6, traction control, ABS leh EBD leh electronic stability program te a awm dawn a. Maruti Invicto thar hi seating configuration pahnih – seat 7 leh seat 8 hmang a awm a. 7-seater version hian captain chair pahnih a nei dawn a, a tlar lai tan ottoman function a nei dawn a. Seater 8 awmna model hian row hnihna leh pathumnaah bench seat a nei thung dawn a ni.