Aizawl: Mizorama cheng Meitei Welfare hruaituten nimin khan Raj Bhavan-ah Larsap Dr Hari Babu Kambhampati an kawm a, Manipur-a buaina chhuak pawi an tih thu leh Mizorama cheng Meitei-te an thlamuan thu an hrilh.
He an inkawmnaah hian Mizoram Meitei Welfare hruaitute chuan larsap hnenah hian tun hnaia Manipur buaina chu thinlung taka pawi an tih thu te, remna leh muanna a awm leh thuai an duh ber tih an sawi a, remna leh muanna duh, Mizo mipuite zingah an cheng chu vannei an in tih thu leh an thla a muang tih an sawi.
Tun hnaiah Mizoram sorkar hotulu te, YMA hotu te leh zirlai pawl hruaitu te an biak tawh thu te, an tawngkam chhuak leh an lo dawnsawn danah te an thlamuan thu larsap hi an hrilh bawk.
Meitei Welfare hruaitute chuan Manipur-ah a rang thei ang bera remna leh muanna a awm theih nan India president hnenah ngenna an siam a, an ngenna chu lehkha a ziakin larsap chu thehluhsak turin an ngen a ni.