Aizawl: Chief Minister Zoramthanga chuan Mizoram hmasawnna leh siam that hna chu a ram neitu, a chhunga chengte kutah a innnghah thu a sawi.
Mizoram State Cooperative Marketing & Consumers’ Federation Ltd. (MIZOFED) chuan nimin khan Synod Conference Centre, Sikulpuikawn Aizawlah Annual General Assembly vawi 25-na an hmang a; Chief Minister Zoramthanga chuan khuallian niin he hun hi a hmanpui.
Khuallian chuan hmasawnna atana cooperative society din pawimawhna leh tulna hmathlir nei chungin a remchan dang anga MIZOFED hi bul tan a nih thu a sawi a. “Cooperative movement hi ramin chak zawka hma a sawn theih nan a pawimawh a. Hmasawnna hna sorkarin a ruahman leh a duante chu a theihna chen chenah privatize zel a pawimawh a ni,” a ti.
Mizoram hmasawnna leh siam that hna chu a ram neitu, a chhunga chengte kutah a innghah thu sawiin chief minister hian, “Hripui leng leh thil dang dang avangin harsatna ramin tawk mah ila, kan tawn aia chhiatna nasa zawk lo tawng tawh ram ropui taka insiam a intungding leh ta te hre rengin, hmasawna nasa zawk kan thlen thei a ni tih hria a, mahni zawn theuhah thahnemngai taka ram tan thawk ang u,” a ti.
He hunah hian Cooperative Societies Registrar Amol Srivastava leh Commerce & Industrial Development Board Vice Chairman K Laldawngliana, MLA, te pawhin thu an sawi a. Khuallian chuan Mizofed hnuaia division pathuma branch hrang hrang tithate POL division: Lawngtlai Branch; LPG division: Aizawl Branch leh E&C division: MIZOFED Store, Lunglei te hnenah lawmman a hlan a. Lawmman hian certificate leh Rs 8,000 theuh a keng tel a ni.