Aizawl: Mizoram Journalist Association, Lawngtlai District chuan nimin khan Green MJA Day an hmang a, thing an phun tawhte sam fai leh thawm that ngaite an thawm tha.
Green MJA Day-ah Lawngtlai District MJA te hian state leh LADC sorkarin thingphun beihpui an thlaka Lawngtlai leh Mampui inkara thing phunte dipdaltu hnim an sam fai bakah thawm that ngaite thawm thain an thawk chhuak a ni.
Lawngtlai District MJA chuan Green MJA Day chu thingphun leh enkawl zuinaah mi dangte kai harha zirtirtu a nih beiseia hman thin an nih thu an sawi a. Thingphun leh enkawl zuiah Lawngtlai district-in hmasawnna duhawm tak a hmu chu lawmawm an tih thu sawiin hmasawnna hnathawhten ramngaw leh nungcha, lui dung a tichhe nasa lutuk thin chu hun lo kal zelah chhiatna nasa zawk thlentu tur leh a nghawng hmuh theiha lang chho mek a nih vangin, awmze nei zawka hmasawnna hnate chu thawh thin nise an duh thu an sawi.
Kum tina thingphun beihpui thlak thinah LADC-a Environment, Forest & Climate Change Department-ten enkawl zui hna an thawk thin chu lawmawm an tih thu leh phun tam aia enkawl zui puitlinin awmzia a neih zawk an sawi bawk.
Lawngtlai District MJA hian kum 2016 atangin Green MJA Day hi June 15-ah an hmang thin.