Manipur chhunga tlangmi leh Meitei inkara buaina chhuak chu thla khat liam hnuah pawh ziaawm lam a la pan thei lo a, a khât tawka inkahna a la thleng reng.
Manipur atanga thudawn danin Nilaini khan Imphal East district leh Kangpokpi district inkara awm, Khamenlok chu Meitei-ten ralthuam tha tak tak nen luhchilhin an inkap a, he inkahnaah hian mi 10 thiin, mi 10 dangin hliam an tawrh hnuah Meitei lamin khua hi an chhuahsan leh a ni.
Chawlhkar tir, Thawhtanni atang khan Arambai Tenggol leh an thurualpui ralthuam tha tak tak keng nia sawiten Khamenlok bulhnaia Khopibung, Chullophai leh Aigejang khuate chu kil thum atanga panin beih tumin an thawk chhuak a; mahse, Zohnahthlak lamin an lo hriat lawk avangin Khopibung khaw luh dawnah lo dangin an inkap nasa hle a. Meitei lam mi eng emaaw zat an thi niin an sawi.
Thawhlehni khan Arambai Tenggol-in Jordanphai, Songjang, Gojang leh Thuombul khua te hal tumin an thawk chhuak leh a. An tam hneh em avangin tribal village volunteer-te pawhin lo dang zo loin an insaseng a. Village volunteer zinga pakhat chu thah a ni a. Hemi zan hian Aigejang khuaa biak in pakhat la sak zawh lohah Meitei mi 60 an riak a ni.
Hlawhtling taka khua rûn zoa inngaia thlamuang taka Aigejang-ah awmhmun khuara zute ina an inthlahdah lai takin tribal village volunteer-ten an luhchhuah thut a. Meitei lam mi pakhat chu insaseng hman mah se mi eng emaw zat an that hman a. An thah zat tak erawh hriat theih a ni lo a. Meitei-te hnen atang hian silai 31 an laksak a. A ni la la hian mitthi ruangte hi army-in ambulance 13 hmangin an thiar chhuak nghal a ni.
Arambai Tenggol te hi Gurkha Regiment-in khua atangin um chhuah tuma an beihna lamah, Arambai Tenggol commando-ten Gurkha Regiment mi leh sa pakhat an kap hlum a. Meitei lam mi eng emaw zatin nunna an chân a. Army-ten ruang hlawm tura an kalin Meitei lam mi 100 chuang ruang an hmuchhuak nia sawi niin, Meitei-ten Khamenlok area-ah network tower an tihchhiat avangin thi leh hliam zat tak erawh hriat theih a ni lo.
Khamenlok khuaa buaina nasa zawk a thlen loh nan Imphal West-ah curfew puan nghal a ni bawk.