India-a wrestler lawk tak takten hmeichhe wrestler-te laka mipat hmeichhiatna lam hawia chea an puh avanga amah duh lohna rei tak an lantir hnuah wrestling chief kal chhuak chiah chu court-in an puhna ang hian puhna a siam.
Police chuan an chhui hnuah Brij Bhushan Sharan Singh-a hian mipat hmeichhiatne kaihhnawihah mi enthla/zui ru, tihlauvah an puh a ni.
Rorel lai, BJP MP thiltithei tak, Singh-a hian an puhna hi a pha thung.
Police hian puhna nei mah se kumtlinglo laka che anga puhna erawh an siam tel lo va. “Finfiahna tha tawk hmuh tur a awm lo,” an ti.
Wrestler-ten Singh-a laka lungawi lohna an lantir hi khawvel pum hriat a ni a, a bik takin police-in Delhi-a parliament building thar thleng kawng zawh an tum an dana an hren atangin ngaihven a hlawh lehzual.
Video leh thlalak darhah chuan Olympic medallist pahnih, Sakshi Malik leh Bajrang Punia leh world champion medallist vawi hnih ni tawh, Vinesh Phogat te chu khawlaiah man beha dim lo takin police van-a an hnawh lut lai a lang a, infiam mi a neih that ber berte laka police chet dan chuan sawi a hlawh zui hle.
International Olympic Committee (IOC) pawhin wrestler-te chunga chet dan chu demin an thil phutte chu thlei bik nei lova chhui ngei a phut bawk.
Wrestler-te hian April atang tawh khan Singh-a laka lungawi lohna hi an lantir tawh a, tun thla tirah khan Home Minister Amit Shah leh Sports Minister Anurag Thakur kawmin an thil phut lantirna hi an chawlhsan rih a ni.
Thakur-a hian Singh-a laka an thil phutte chu chhuiin June 15-ah tihfel a tiam a ni.
Hmeichhe wrestler pasarih, an zingah kumtlinglo pakhat telin, police hnenah Singh-a hian mipat hmeichhiatna hawiin a ti thin a, training camp leh tournament-ah pawh man beh changte pawh a nei niin an thlen a. Kumtlinglo laka a che nia thlen a nih avang hian police pawhin dan khauh tak, Protection of Children from Sexual Offences (Pocso) Act hmangin an chhui a ni.
Singh-a hian an puhna zawng zawng hi a pha a, wrestler-te hi ‘politics khelh nana fuihtu’ an awm niin a sawi a. An puhna hrang hrangte hi finfiahna pakhat pawh an hmu a nih chuan ‘a inawh hlum tur thu’ thlengin tun hnaiah a sawi a ni.
Ningani khan Delhi police chuan court hranah an chhuinaa an thil hmuh hrang hrangte chu phek 1,000 chuanga chhah lehkha an thehlut a. Lehkha phek tlem zawkah chuan kumtlinglo laka a che nia puhnaa an hmuh dan tar lan a ni.
Ni rei vak lo liam ta atang khan kumtlinglo lakah pawh a che nia puhna hi a puhtu hian a hnukdawk nia sawi a awm a, ‘nasa taka nawrhna a awm vang’ tia sawi pawh a awm bawk a. Singh-a chuan a nawr nia sawina chu engmah a sawi duh lo va, ‘danin ro a rel mai dawn a ni’ tih chauh a sawi duh.
Dan thiamte chuan tunah chuan chhui zawh a nih tak avangin judge-in a pawm dawn nge thubuai chu a titawp dawn tih ngaihchan a ngai ta tih an sawi a. July 4-ah ngaihtuah tan a ni dawn a ni.
Singh-a an puhna leh chhuina kimchang hi hriat theih a nih tak avangin dan thiamte chuan tam tak chu bail theih a ni tih an sawi a, hei vang hian rang taka man a nih a rinawm loh niin an sawi.