Aizawl : Aizawl West I bialtu MLA Zothantluanga’n “Sorkar tha kan neih avangin kan bial chhungah hmasawnna tam tak kan hmu a, kan la hmu zel dawn bawk” a ti.
YMA, Luangmual branch, Aizawl te YMA Day a hmanpuinaah he thu hi nimin khan Zothantluanga chuan a sawi a. A bual chhunga hmasawnna te avanga lawm nachang hre turin YMA Day hmangtute chu a chah.
Aizawl West I bialtu MLA chuan tunlai thiamna leh changkanna sang zelah, aia upa zahna a tlahniam ta hle niin a sawi a. “Mahni tapchhak zawl atangin mahni duhna lam lam kan hawi thei tawh a. Awmhmun atangin duh duh sawiin, duh duh kan be thei tawh a. Hmel inhmu kher lova midang kan biak theih avang hian aia upa zahna kan tlakchham phah niin a lang” a ti.
“Tawngkam mawi leh hawihhawm hman kan ching peih ta mang lo” tiin Zothantluanga chuan “Kan Zonun zemawi pawh zawi zawiin kan kalsan zel tawh, Zonun zemawi tivul leh turin theihtawp i chhuah thar leh ang u, a ti bawk.
Nimin vek khan Aizawl West I bialtu MLA chuan MLA fund hmanga sak, YMA, Luangmual branch M section property house sak thar pawh a hawng a. YMA, Luangmual branch hnenah hian MLA fund hmang veka lei Ambulance thar a hlan nghal bawk a ni.