Aizawl : MZP chuan nimin khan an pisa puiah All Mizoram Manipuri Association (AMMA) hruaitute kawmna neiin, Manipur tualchhung buaina avanga zofate tawrhna chungchang an sawiho.
He inkawmnaah hian MZP lam hi an president Lalnunmawia Pautu chuan hoin, “Nangni Mizoram-ah zalen taka in awm laia Manipur-a Kan unaute tawrhna hi en liam mai mai harsa kan ti a. Thil tha zawk a thlen theih nan hma in lak loh chuan in chungah a chhe ber pawh thleng thei a ni,” a ti a. “Manipur Zofate chunga thil thleng ang hi in chungah thleng ve se in duh a nih loh chuan a rang lamin buaina a reh theih nan hma in lak a ngai,” tiin, “in hmalakna kan enzui zel ang,” a ti bawk.
He inkawmhona hian Manipur-a Zofate tawrhna a reh theih nana All Mizoram Manipuri Association hmalakna leh hmalak dante chu hun remchang hmasa bera thlirho leh turin thu an dah a ni.
AMMA hruaitute hi an President Wahengbam Gopeshore hovin hruaitu 6 an tel a. AMMA ten June 14-a Mizoram Larsap kaltlanga India President hnena an thu thlente an sawifiah a, pawl pahnih hmalakna te ngaihthlak a ni bawk.