North Korean hruaitu, Kim Jong Un chuan coronavirus hripui avang leh nikuma typhoon an tawrhten thlai chinna hmun tam tak a tihchhiat avangin an ramin ei barah harsatna lian tak an tawk mek tih a sawi niin an sorkar chanchinbuin a tar lang.
Kim-a hian rorel lai, Workers’ Party-a central committee plenary meeting-ah a pum pui thua an ram economy chu kumin kum chanve kal ta chhungin a thang a, industry lamin an thawh chhuahte chu nikum aiin 25%-in a pung niin a sawi tih state news agency KCNA chuan nimin khan a tar lang.
Hetih rual hian an party chuan harsatna dang an tawhte laka inchhan chhuah nan tih tur an nei tih a sawi a, a bikin ei leh in lama harsatna an tawh chu inhai chhuah a ngai.
“Nikum lama typhoon kha lo lamin a tawrh em avangin mipuite ei tur lam a hartsa a, thar chhuah a tlem a ni,” tiin Kim hian a sawi.
Thawhlehnia thukhawm hian February thlaa an thutkhawma an duan, five-year economic plan chu tihhlawhtlin dan tur an sawiho va. He plan-ah hian ei leh in lam leh thir lam thar chhuah hnem chu an tum ber pakhat a ni.
Party hian kumin chhungin lo lam atanga thar chhuah tihpun an tiam a, COVID-19 hripui beih let dan turte pawh an sawi niin KCNA chuan a tar lang.
Kim-a hian khuarel chhiatna thlengin a nghawng nat loh zawk dan tur duang turin a ti a, chu chu kumin chhunga tum lian ber pakhat a ni.
January thla khan Kim-a hian five-year economic plan an neih hmasak chu kawng (sector) hrang hrangah a hlawhchham niin a lo sawi tawh a. Hei hi power leh ei tur lam an tlakchham vang niin a sawi a. Hripui leh tui lian an tuar na bawk niin a sawi.
Hripui avangin an party chuan mipuite ei tur, silh leh fen leh in a pek a ngai bawk si niin a sawi tih KCNA chuan a tar lang bawk.
North Korea-ah hian COVID-19 kai an la awm miah lo angin sorkar chuan a chhinchhiah a, ram tam takte erawh chuan an awih lo hle.