A thenawm ram pahnih, China leh Pakistan aiin nuclear ralthuam nei tlem zawk mah se sipaite tihchakna kawngah ralthuam danga ruahmanna tha a neih avangin India a thlaphang lo.
India hian Agni-V missile a peih fel thawkhat tawh a, Rafale indo thlawhna, France atangin a dawng kim tep tawh a, kumin kumtawp lamah nuclear ralthuam pai thei tuihnuailawng, INS Arighat a nei thar bawk ang.
Stockholm International Peace Institute (SIPRI)-in Thawhtannia khawvela ralthuam nei ram leh an neih zat a tar lanah China-in nuclear ralthuam 350 an nei a, Pakistan-in 165 neiin India hian 156 a nei.
Khawvel ram pakuain nuclear ralthuam a neih zawng zawng belhkhawm chu 13,080 a ni a. Russia-in ngah berin 6,255 an nei a, US-in dawtin 5,550 an nei a. France-in 290, UK-in 225, Israel-in 90, North Korea-in 40-50 inkar vel an nei bawk.
SIPRI-in ram hrang hrang neih zat a tar lante hi nuclear ralthuam nei ramten a ruk thei ang berin an kalpui thin avangin a dik lo thei thung.
Russia leh US tih loh ram dang pasarihte hian nuclear ralthuam chi danglam leh tha bik an siam ve mek a. China-in an nuclear ralthuamte chu tunlai thei ang berin an cheibawlin huang an zauh mek a. India leh Pakistan pawhin a aia tam neih tumin tan an la mek bawk tiin SIPRI hian a tarlang.
India thuneitute chuan nuclear ralthuam neih teuh aiin fing leh felfai zawka hman theih tura duante a tak takah an tangkai zawk dawn a. Khawmuala hman theih ballistic missile leh ballistic nuclear missile (SSBNs) phur thei nuclear chakna hmang tuihnuailawng, an bitum vawi hnih kap theite chu an tangkai zawk niin an tar lang.
“A taka indonaa hman aiin ram pahnih inkara inchotuahna atan nuclear hi hman a ni mai a. Pakistan-in China leh North Korea ramte chu an nuclear ralthuam tihchangtlunna atan an hmang a. India erawh chuan tual chhung finna leh thiamna hmangin a tunlai thei ang berin a duang mek a, hmelmate dona kawngah a ngah ve tawk thawkhat,” tiin thuneituten an sawi.