Aizawl : Nimin khan Aizawl South III Bialtu MLA Prof.F.Lalnunmawia chuan Thiak leh Phulpui Branch YMA-ten YMA Day vawi 88-na an lawmna chu khuallian niin a hmanpui.
Thiak leh Phulpuia YMA Day lawmnaah hian Prof.F.Lalnunmawia MLA chuan thusawiin, “YMA hi pawl ropui leh zahawm tak, Mizoram chhung leh pawn thlenga zofate min phuar khawmtu a ni. YMA hi mitin huapzo a ni a, Kohhran leh political party hrang hranga awmte pawh zaikhata kan luanna a ni,” a ti a, “YMA chu a dinchhan angin Kristian nun dan ṭha ngaisangtu, lusun khawhar hnemtu, hmeithai, pachhia leh ṭanpui ngaite ṭanpuitu ni zel se. YMA member-te hi zonun ze mawi, tlawmngaihna, aia upate zahna kawngah leh faina kawngah midangte tihhmuhtu ni zel ang u,” a ti bawk.
Prof. Mawitea chuan, “YMA in a ngaih pawimawh em em ram leh hnam humhalh te, zofa te inpumkhatna leh ruihhlo dote hi kan sorkar pawhin a ngai pawimawh hle a, kan thenawma zohnahthlakte harsatna tawh mekah pawh kan sorkarin an thlavang hauhin raltlante pawh theihtawpin a chhawmdawl mek a ni,” a ti bawk a ni.
Thiak leh Phulpui YMA Branch-te hian zirlai pass tharte leh mi hmingthate chawimawina hun an hmang a, YMA Day Vawi 88-na hi ruai nen ropui takin an lawm.