West Ham United chuan Arsenal hnen atanga England midfielder Declan Rice lei dilna hmasa ber chu an hnawl.
Gunners hian Rice hi tun nipui a player an lakluh tum berah an dah a, British chanchinbu hrang hrangin inremna an nei thuai dawn niin an sawi nasa.
Nimahsela kum 24 mi lei dilna an thehluh hmasa ber chu Hammers hian an hnawl a. An dilnaah hian a man hi sum hlawm a inpe tla nghal lova a khelhdan a zira inpek tura rawtna a tam lutuk avangin an duh lo.
West Ham hian Arsenal nen hian inbiakna neih chhunzawm erawh an inring a, hetihlai hian Manchester City hnen atangin dawrna dawn an beisei ve bawk.
Manchester City erawhin Rice chungchang zawhna engmah an chhang duh rih lo.
City-ah hian captain Ilkay Gundogan leh playmaker Bernardo Silva te hma hun a chiang lova. Hei vang hian tun nipuiah midfielder thar an ngaihven a ngai mai thei.
West Ham chairman David Sullivan chuan tun thla tir khan Europa Conference League a an champion hnuah Rice chu a chhuah ngai a rin thu a lo sawi tawh a ni.
Rice hian kum 2016-17 season khan West Ham United academy atangin professional football zinkawng bul a tan a. An tan vawi 245 inkhel tawhin goal 15 a khung tawh.
England tan vawi 41 inkhel tawhin nikum World Cup khan England in match nga an khelhah a inkhel kim vek.
A thianpa pawh
Declan Rice-a thianpa leh a England teammate Mason Mount lei tuma Manchester United in Pound maktaduai 40 a Chelsea an dawrna chu Blues in an hnawl.
United manager Erik ten Hag hian kum 24 mi Mount hi season thara a midfield tichak turin a duh a. Hetihlai hian England international hian a contract-ah kum khat chauh a neih tawh avangin Chelsea in a man atana Pound maktaduai 70 an beisei chu Red Devils thil awm angah an ngai lo.
United hian Mount hi lei tumin an dawr leh ngei dawn niin a lang a, hetihrual hian tun nipuiah position dang a player lakluh an mamawh avangin a manah sum sen teuh an tum lo.
Tun nipuiah United hian player lakluhna a an sum hman an fimkhur a ngai a, club neitu thar awm pawh nise an tawngpawng hman tam vak thei dawn lo.
Hei vang hian an striker duh Harry Kane pawh Tottenham atang Pound maktaduai 100 vela lalut tura sawi nimahsela umzui loh an thlang zawk dawn niin a lang.
Ten Hag-a’n tun nipuiah striker thar lakluh dah pawimawh ber mahse Mount hi an midfield-ah duhthlan tur a neih belh nan a duh.
Kum ruk mi a nih atanga Chelsea academy a zawm tan Mount hian season thum chhung Chelsea first team-ah player pawimawh niin UEFA Champions League pawh a lakpui tawh. Tun season-ah erawh Premier League inkhel vawi 20-ah chauh bul a tan a, season tawp lamah a inhliam bawk avangin Chelsea first team-ah a hmun a nghet lo.
Blues in contract thar ziahpui tum mahse an inrem thei lova, anni lamin Financial Fair Play dan an bawhchhiat loh nan hralh an ui lova, player in Old Trafford a kal a chak bawk.