Serhmun Bethel khuaa tek tlain mi paruk a den zinga mi pakhat chu nimin khan a hliam tuar loin a thih belh.
Nilaini khan Synod hnuaia Tripura Mission Field-a Darchawi Pastor Bial chhung, Serhmun-Bethel khuaa Upa Lalngaizuala (Serhmun kohhran upa) kuhva huanah mi paruk (hmeichhia leh mipa pathum ve ve)-in kuhva an phun laiin ruah sur avangin thlamah chawlin an tawm hul a. Thlama an chawlh lai chhun dar 11:30 velah tekin dengin Robishree, kum 28, Tripura chu thlamah a thi nghal.
Tek tlain a den zingah pakhat chiah hliam tuar loin a awm a, hliam zinga pahnih hi an nat deuh avangin Unakoti District Hospital-ah kalpui an ni a, pahnih dang hi an hliam a nasat lem loh avangin Marchmara Hospital, Pecharthal-ah dah an ni thung.
Hliam tuar na zual pahnih zinga mi, Dabarung (Mawii), kum 26, Tripura hi Nilaini zan khan hmun lam refer niin Silchar panpui a ni a, a hma lama damdawi in thlenpui hman ni mah se engmah tih hman loin nimin zing dar 2:30 khan a hliam tuar loin a thi a ni.
Hliam tuar na zual zinga pakhat zawk, Upa Ngaizuala chu harh deuh tawh mah se, a dinhmun erawh a la tha lutuk lo bawk.
Thlama an chawlh laia tek tlain a den zinga a hmuna thi nghal, Robishree hi an nupaa inhlawh niin a pasal, Biplop Chakma pawh hliam zingah a tel a. Anni hian fa mipa pahnih, kum nga mi leh thla li mi an nei a ni.