Croatia in an ram chanchin a trophy lian hmasa ber chawi turin vawikhat hnehna chan bak an mamawh tawh lova. UEFA Nations League final an khel dawn.
Nilaini zan khan Rotterdam a Stadion Feijenoord-ah Netherlands nen semi-final an khel a, 4-2 in extra time ah hnehna an chang.
Hun pangngaiah Croatia hi 2-1 a chak mai tur an ang hman viau a, nimahsela minute 96-naah Noa Lang chuan Netherlands si phurh a sut.
Extra time khelh ngaiin Croatia tan substitute Bruno Petkovic chuan goal mawi minute 98-naah a khung hnuah huntawp hma in Luka Modric chuan penalty atangin goal dang a khung.
Mahni mualah Netherlands in Donyell Malen hmangin goal khungin hma hruai hmasa zawk mahse second half-ah Andrej Kramaric penalty pet goal leh Mario Pasalic goal khung hmangin Croatia in an chhanglet.
Zlatko Dalic-a pawlte hian Pathianni zana final khel turah nizan a Italy leh Spain inkhel a chak zawk an hmuak a. Netherlands in third-place playoff an khel ve thung ang.
Inkhelh zawhah Croatia coach Dalic chuan, “Croatia mipuite tana hnehna a ni a, an fans te hmaah Netherlands kan hneh a, Croatia in medal kan fans te tan kan hlawhchhuak a ni.”
“Bronze leh silver kan hlawhchhuak tawh a, gold la a kan zinkawng hi zawh theih kan tum. He hnehna hi kan tan a pawimawh a, Netherlands a chak hi thil har a ni a, mahse kan phu.” tiin a sawi.