Manipur tual chhung buaina tlansana Mizorama tlan lut an pung zel a, raltlan tam zawk hi YMA-in an buaipui a. Raltlan buaipui hi a hau tak avangin sorkar chu chak taka a chet thuai thuai a tul hle tih Central YMA president R Lalngheta’n a sawi.
The Zozam Times zawhna chhangin CYMA president chuan Manipura raltlan, Aizawla lut tam zawk chu Central YMA Office-a Manipur Raltlan Transit Camp-ah an innghat a, chu lai hmun atang chuan khawpui chhung branch hrang hrangin an hmunah la chhuakin an enkawl mek tih a sawi.
Ngheta chuan transit camp-a inenkawl, ei leh inte pawh a hautak a, YMA branch malin raltlan an enkawlna kawngah pawh khawtlang mipuiin sum leh pai an seng nasa tih a sawi a, “Raltlan buaipui hi a hau tak em a, sorkar hi chak taka a chet thuai thuai hi a tul tawh hle a ni,” a ti.
CYMA president chuan Manipur Zohnahthlak raltlante hi YMA-in a buaipui zel dawn a, a tlanchhiatsan dawn lo tih a sawi a, chutihrual erawh chuan mi thilphalte pek khawm hmanga inenkawl reng erawh a buaithlak chin a awm theih avangin a che tur sorkar chu a chet vat a pawimawh hle tih a sawi a ni.
Manipur raltlante chawlh lailawkna tur an siama awmte mamawh chu mi mal inphal, kohhran leh branch YMA ten an pe khawm tih a sawi a, mi mangangte puihna kawng pawl leh mi mal inphalna leh inpekna chu ropui an tih thu CYMA president chuan a sawi bawk.
Central YMA office-a Manipur Raltlan transit camp hi June 3 atang khan kalpui tan a ni a, nimin chawhnu thleng khan lut hi mi 228 an awm tawh a; a tam zawk chu hmun dangah an insawn chhuak leh tawh a, tun dinhmunah mi 61 an awm mek a ni.
Manipur Raltlan Transit Camp-a lutte hi Aizawl khawpui chhung brang hrang hrangah sem darh an ni a, tun dinhmunah chuan branch pakua – Electric Veng, Chanmari, Vaivakawn, Tuikhuahtlang, Hlimen, YMA Mission Veng, Thuampui, Kulikawn leh Tuirial Airfield Branch YMA ten raltlan thahnem tak chu mikhualin an enkawl mek a ni.
Raltlan luh tamna, NE Khawdungsei bul, Tuivai kaltlangin ni tin lirthei eng emaw zatin raltlan an lo thleng thin a, Tuivai kâna lutte hi Saitual, Aizawl, Kolasib district leh hmun dang dangah te an kal thin.
Manipur atanga Mizorama lirthei lut hrim hrim hi chu tam mah se eng emaw zat hi raltlan daha hruaitu niin an kir leh thin a. June 14 zing dar 6 atanga nimin zing dar 8 thleng khan lirthei 21 lutin raltlan leh anmahni hruaitu mihring 64 an chuang a ni.
Hetih rual hian Tuivai kaltlang hian Mizoram atangin ni tin mamawh a lut ve reng tho a, June 13 zing dar 6 atanga nimin zing dar 6 thleng khan hriat theih chinah eirawngbawlna gas bur 1,898, petrol barrel 36, diesel barrel 38, buhfai bag 1,554 bakah dal, chana, archaw leh cement te a lut a ni.