Himalaya tlangdung, Kashmir-a sipai chakna nena an inep utna boruak tihziaawm dan tur sawi dunin January thla khan ram inhal tak pahnih, India leh Pakistan mi pawimawhte chu a rukin Dubai-ah an inbia niin he thil hria pakhat chuan New Delhi-a Reuters news agency a hrilh.
Ram pahnihte inhal tak sa an nih rualin kum 2019-a India sipai, Kashmir-a convoy-a kalte beih an nih atang khan an inen thar lehzual a. He thiltitute chhuinaah Pakistan-a inkulh firfiakte tihah chhal a ni a, India thinrim chuan Pakistan ram chhungah a indo thlawhna a thlawh luhtir hial.
Hemi kum tawp lamah hian Prime Minister Narendra Modi chuan Muslim tamna, Kashmir-in ro inrelna hran deuh bik a neih thin chu a hlip zui a. Pakistan pawhin hei hi a duh lo hle a, inbiakna pawh kalpui zui loh niin ram pahnih inkara insumdawn tawnna pawh kalpui theih loh a ni zui.
Hemi hnu lamah erawh sorkar pahnih hian kawng an hawng hret hret a, an inkar tihthat tumin hma an la dun hret hret.
Kashmir hi India leh Pakistan inngeih loh chhan ber a ni a, anmahni ram ve veah an chhal a; mahse, tlem ve ve chauh an awp thung.
India-in ram pawn lama hnuchhui mi a neih, Research & Analysis Wing leh Pakistan-in Inter-Services Intelligence (ISI) mi pawimawhte chu Dubai-ah hian United Arab Emirates sorkar telpuinain an inbia niin mi pahnih an sawi.
Inbiakna a awm tih sawi chungchangah hian Indian foreign ministry engmah a sawi zui duh lo va. Pakistan sipai, ISI enkawltute pawhin engmah an sawi lo.