Union Home Secretary Ajay Kumar Bhalla-a’n Manipur atanga an sahimna zawnga Mizoram beltute tanpuina tur sum Mizoram sorkar hnena pek thuai a nih tur thu hemi chungchanga ni- mina Mizoram sorkar aiawha amah dawrtu Minister of State Ro- bert Romawia Royte a lo hrilh.
Manipur buaina avanga an sahimna zawnga Mizoram beltute chungchang Mizoram sorkar aiawha sorkar laipui hotute sawipui tura ruat Minister of State Robert Romawia Royte chuan nimin khan Union Home Secretary Ajay Kumar Bhalla chu a pisa-ah a hmu a. Union Home Secretary chuan hemi chungchanga Mizoram Chief Minister rawtna a lo hriat tawh thu leh sum pawh pek thuai a nih tur thu a lo hrilh niin sorkar thuchhuah chuan a tarlang a ni.
Robert Romawia chuan May ni 3, 2023-a Manipur-a buaina a chhuah atanga tun thlenga Mizoram sorkar hmalak dan, Chief Minister Zoramthanga’n Union Home Minister leh Manipur Chief Minister-te phone-a a biak dan te, Prime Minister leh Union Home Minister lehkha a thawn thu te Robert Romawia chuan Union Home Secretary chu hrilhin, an sahimna zawnga Manipur atanga Mizorama lut mi 11328 an awm mek thu leh heng mi te hi naupang, hmeichhia leh kum upa lam an nih thu te, mipa thalaite chu an in leh lo veng tura Manipur lama an awm nia an hriat thu te a hrilh bawk.
Robert Romawia chuan Manipur tualchhung buainain ziaawm lam a la pan theih loh avangin sorkar laipui chu a tul anga a inrawlh zel a tul thu Union Home Secretary chu a hrilh a. Mizoram sorkar, NGO leh kohhrante chuan Manipur buaina avanga an sahimna zawnga Mizoram beltute chu a theih ang anga an lo enkawl thu leh sorkar laipui puihna an mamawh thu te pawh a hrilh niin sorkar thuchhuah chuan a tarlang.
Sports Minister Robert Romawia Royte chuan Assam Rifles-in AR Lammual chu a rang thei ang bera Mizoram sorkar kuta an hlan tul a tih thu pawh Union Home Secretary chu a hrilh a. AR Lammual bula Laldenga Centre lungphum Union Home Minister-in a phum tawh chu, a taka hna tan thuai a tul thu hrilhin, NOC pechhuak nghal turin a ngen a, Union Secretary chuan tihfel thuai an tum thuin a lo chhang niin sorkar thuchhuah cuan a tarlang bawk a ni.