India hmar lam, Uttar Pradesh-a tun hnaia khaw lum lutuk kaihhnawiha mi eng emaw zat thleng chuan politics-a inbeihna a siam nasa hle.
Ningani leh Inrinni inkar khan state khawpui, Lucknow atanga km 274 vela hla, Ballia district-ah khaw lum lutuk avangin mi 54 lai an thi nia sawi a ni.
He district-a hriselna lama hotu lian chu a awmna sawnsak nghal a ni a, hei hian inhnialna a siam zui ta hle a ni.
State sorkar chuan thihna thlengte en zuia report kimchang siamtu tur panel a din nghal bawk.
Uttar Pradesh-ah hian kar liam taah khan hmun tam takah khaw lum lam chu 42°C leh 47°C inkar hial a ni a. Sorkar chuan kum upate chu pawn chhuak tam lo turin an ngen.
An thenawm, Bihar-ah pawh tual chhung chanchinbute chuan May 31 atang khan khaw lum kaihhnawihah mi 40 an thi tawh niin an sawi a, hei hi state sorkar erawh chuan a nemnghet lo thung.
Bihar-a Health Additional Chief Secretary Pratyaya Amrit chuan he mi chungchangah biakpawh tumna a chhang duh lo va. Disaster control room-a hotu, Dr Umesh Kumar chuan BBC Hindi hnenah an state-ah khaw lum kaihhnawiha thihna thleng 15-16 vel report a dawn thu leh tlai lamah a chian theih tur thu a sawi thung.
Uttar Pradesh-a thihna thleng chungchanga inhnialna hi Zirtawpnia Ballia District Hospital chief Diwakar Singh-a’n thuthar lakhawmtute hnenah mi 25 vel an thih thu leh khaw lum lutuk vang a nih theih thu a sawi atanga intan a ni.
“Damlo tam zawk hi kum 60 chung lam leh natna benvawn nei an ni a. Khaw lum an tawrh khan an zual a, damdawi inah dinhmun tha lo tak niin an lo kal a. Enkawlna tha leh damdawi pek an ni chungin an thi ta tho a ni,” a ti.
A tukah a hnathawhna hmun hi sawn nghal a ni ta a. Deputy Chief Minister Brajesh Pathak chuan Dr Singh-a thil sawi dan hi ‘fimkhur lohna’ a nih thu a sawi a, sorkar erawh chuan heng thil thleng hi ‘a ngai thutak hle thung’ niin a sawi.
Thuneitu sang pahnih tirh an nih thu leh report pawh an siam tur thu an sawi bawk.
An tirh zinga mi, AK Singh chuan tunah rih chuan khaw lum vanga thihna thleng a ni tih finfiah theih a la nih thu a sawi a, anmahni ang bawkin district dangah pawh khua a lum a, thihna a thleng ve si lo tih a sawi.
“Khaw lum vang ni turin an khawsik pawh a sang em em hlawm lo a ni,” tiin thuthar lakhawmtute hnenah a sawi bawk.
Thuneitute hian thil dang vang a ni thei em tih pawh an en zui mek a, a bikin tui thianghlim lo in atang a ni em tih an en a. Hetih rual hian thite hi khua/veng khata mi, tui tlan thuhmun an ni em tih erawh hriat theih a la ni lo.
Thihna thleng hi politics-a inbeihna atan hman zui mek a ni a, eptu hruaitute chuan sorkar chu ‘fimkhur lo’ tiin, mipuite hnenah khaw lum tur hrilh hre tha lo niin an puh.
“Nunna chânte hi lo neitu rethei tak tak an nih avangin chaw, damdawi leh enkawlna pawh a hun takah an dawng tha lo a ni,” tiin chief minister hlui, Akhilesh Yadav chuan a sawi.