Miami hmar lama mihring chenna in chhawng 12-a sang chim tlusawp karah chhanchhuah hna thawktute chuan dam chhuak zawn hna ngawrh takin an thawh chhunzawm mek zel.
Chhiatna thlengah hian mi pakhat a thi a, mi 99 zet chin hriat lohvin an la awm mek niin thuneituten an sawi.
Chhungkaw tam takin chanchin thar an ngaichang a, mi zawn hna thawktuten chhun zan zawmin an thawk a, in chim karah nung dama la awmte thawm ni awm tak hriat a ni.
Ningani zing khaw var hmaa kum 40-a upa in chim ngawt chhan hi hriat a la ni rih lo.
A chim laia ina awm nia an hriat hi mi 102 an ni a; mahse, chiang taka hriat theih erawh a ni lo va. Nung damin mi eng emaw zat lang chhuah tawh bawk an ni.
President Joe Biden chuan Florida state-in emergency puan a dilna chu a phalsak tawh a, heti a nih chuan Federal Emergency Management Agency-in chhanchhuah leh in chim senghawi hna a thawhnaah state agency-te a pui thei dawn tihna a ni.
Khua a thim hnuah pawh chhanchhuah hna thawktute chuan sonar camera leh mi zawng thuam ui nen an thawk chhunzawm a. In chim ta hnuai, lei hnuaia car park luh thlen tumin an verh a, hetah hian mi an tan an ring.
“Fire & rescue team hi ui fingte nen an thawk chhuak,” tiin Miami-Dade Police Director Freddy Ramirez chuan chanchinbumite hnenah a sawi.
“Mi zawn leh chhanchhuah hna thawh zel a ni a, zanah pawh an chawl lo va, an chawlhsan mai lo vang,” a ti bawk.
Search team hian mihring thawm ni ngeia hriat an nei thin a; mahse, mihring aw erawh hriat fuh tur an la hre lo.
A chung lamah hian in chim bâng tla thei a la tam si avangin hmanhmawh taka rik rum rum a rem si lo va, hmanhmawh leh fimkhur takin an thawk.
“Hna a muang a, uluk taka kalpui a ngai bawk si,” tiin Ray Jadallah, Miami-Dade Fire Rescue assistant fire chief chuan a sawi a. “Eng hunah pawh structure hi la che thut thei a ni a, min tluk hnan thei reng a ni,” a ti.
Ruah a sur a, thli a na angreng bawk a, hei hian hna thawh pawh a tisawt lo hle bawk niin an sawi.