Aizawl Municipal Corporation (AMC)-in Rs. vaibelchhe 10.59 senga a sak, AMC Multi Complex Tuikual South Building chu Aizawl Mayor Lalrinenga Sailo-in nimin khan a hawng.
Aizawl Mayor chuan kum 2015-a corporation-a AMC hlan kai a nih hnuah chak takin thil ro tling dinna kawngah hma a lak thu te, hotu hmasate hmalakna chhuanawm a tih thute a sawi a. AMC chu mahnia inchawm thei tura tih a nih avangin central sorkar atanga a sum dawn a tlem telh telh a; chuvangin, sum lut thei thil ro tling siam turin theihtawp a chhuah zel a tul thu a sawi.
An hawn tak AMC Multi Complex chu mi tam tak tana malsawmna thlentu, eizawnna tam tak siam tura ruahman a nih thu mayor chuan a sawi.
He huna an tar lan danin AMC Multi Complex hi AMRUT fund Rs. nuai 296 hmanga bul tan a ni a, AMC fund hmanga chhunzawm a ni a, August 18, 2017-ah sak tan niin March 13 khan zawh a ni.
Chhawng sarih a ni a, lirthei dahna hmun, bazar leh dawr tur room hrang hrang awmin, a building chung bera hall chu man chawia hman theih a ni.
AMC Multi Complex hawnna inkhawm hi Municipal Commissioner, Er. Lalhriatpuia’n a kai hruai a, Deputy Mayor R. Thanglura leh Tuikual South Local Council Chairman Biakthanzama ten thu an sawi bawk.