AZL: Congress thalai, MPYCC chuan Mizoram Legislative Assembly Secretariat hnuaia thawktu hna lak danah zirlai pawlten fel tawk lo awma an hriat avanga hna lak sut leh tura an hmalakna an thlawp thu an sawi.
Nimin khan MZP leh MSU te huaihawtin Assembly Secretariat-a thawktu tur lak tharah fel tawk lo a awm nia hriain, duh lohna lantirin assembly house kawtah an pungkhawm a. Pungkhawmten Mizoram State Legislative Assembly Secretariat hna lak cancel ni rawh se tih leh recruitment rules thar hnuaiah hna lak ni rawh se tia resolution an siam bakah, hna lakte cancel a nih hma chuan zirlaiten hma an lak chhunzawm zel tura an puan chu MPYCC chuan an thlawp thu thuchhuah siamin an tar lang.
Thuchhuahah chuan Mizoram rorelna in sang, pawimawh leh zahawm ber a hnathawktu lak danah fel tawk lo leh thil tenawm tak awm anga a lang chu pawi an tih thu an sawi a. “MNF sorkarna hnuai a zirlai leh thalai te beidawng hmel hi hmuh hrehawm kan ti tawh hle,” an ti.
MPYCC chuan chief minister awm laia deputy chief minister department enkawl mek hnuaia cheng nuai 100 chuang a hmanna awm lova ziah ral a awm thu hrilh ngam tu leh Minister te an department chan theuh uluk taka vil tur a fuih ngam tu, Mizoram State Legislative Assembly Speaker Lalrinliana Sailo enkawl Mizoram State Legislative Assembly Secretariat hnuai a diklo taka thawktu engemawzat lak a ni hi pawi an tih thu an tar lang bawk.
MNF sorkar Chief Minister Zoramthanga kaihhruaina hnuaia Minister leh MLA te bakah, Mizoram State Legislative Assembly Speaker Lalrinliana Sailo te hian, an mahni thlan an in laih zawh sak tawhah an ngaih thu leh, tun thla li lo awm tur chhung hian chhilh boin an awm dawn tih a lang chiang hle tawhah an ngaih thu MPYCC chuan an tar lang a ni.