Wimbledon champion lai Elena Rybakina chuan round thumna a lut a, a kalkawng erawh a awlsam lo.
Kazakhstan player Rybakina hi Alize Cornet nen an inkhel a, a khingpui hi inkhelh laiin hliamin tibuai mahse Rybakina tan beih fe tham a tling.
French nula Cornet hian a ke dinglam hliam a neih sa chu a tihnat belh a, an inkhelh laiin buaipui ngai mahse a khel tluan thei. A inkhel erawh a hliamin a nghawng tih a lang a, 6-2 7-6 (7-2) in Rybakina a chak.
World number 74 ni lai Cornet hi Wimbledon-ah hian player langsar zawkte hneh fo tawh thin a ni a. Serena Williams vaw thla tawhin world number one Iga Swiatek chak zawn lai pawh nikumah a lo tihtawpsak tawh.
Nimahsela world number three ni lai Rybakina lakah inkhel an tan atangin harsatna a nei tih a hmuh theih.
Rybakina hian set hmasa ber la turin minute 26 bak mamawh lo mahse set hnihnaah erawh tihsual a nei nual a. Hei vang hian a chesual teuh.
Inkhel dangah tleirawl Mirra Andreeva chuan senior level a grass court tournament a khelh hmasak berah third round a lut a. A khingpui Czech 10th seed Barbora Krejcikova chu inhliam avanga inkhel zo thei lovin 6-3 4-0 in a chak.
Kum 16 mi Andreeva hian thla hmasa khan French Open third round a lut tawh a. Tun tumah hian Wimbledon qualifying khelin main draw a thleng thei a ni.
Ukrainian wildcard Elina Svitolina chuan seeded number 28 Elise Mertens 6-1 1-6 6-1 in a hneh a. Kum 28 mi 2019 Wimbledon semi-finalist hian 2020 Australian Open champion Sofia Kenin a hmachhawn leh dawn a. Kenin hian Wang Xinyu 6-4 6-3 in a hneh.