Social media-in a pui a nawia min run mek lai hian hlawkpui aiin, chhiatpui an tam mek zel a, ‘Queen of Pop’ Madonna pawhin a hai lo. A bik takin, Instagram phei chu rilru nuam lo leh hrehawm taka siamtu a ni, a ti hlawl mai.
Kum 64-a upa hian instagram-ah follower maktaduai 19 chuang a nei mek a, social media hian a tha lo lam leh hlauhawm zawngin nghawng a nei mek zel, nia sawiin, “Midang nena inkhaikhinna ruam-ah i tlulut nghal ang. Instagram hian rilru nuam lo leh hreh-awm takah a siam ang che. Midangte thlawpna hmu tura chhiahhlawh anga intulut an ni ringawt,” a ti bawk.
Internet awm hmâ daiha larna leh ropuina a lo nei hman chu Madonna hian malsawmnaah a ngai a, a lawmzia hahipin a sawi. Artist ang taka awm tur leh midangte’n an lo judge buai vakna tur laka fi-hlim theihna remchang tha tak a lo nih lehzel avangin vannei a inti hle a ni.
The Sun chanchinbu nena an inkawmna ah, “Mobile phone leh instagram awm hmâ daih tawha artist nun ka lo nei hman kha vanneihna tawpkhawk a ni. Tunlai social me-dia hun ah hi chuan artist anga inchherna tur leh mihring dik tak anga insiamna tur hian hun ka neih hman pawh ka ring lova, midangte bukna leh tehna hnuaia kun reng tur te, midangte nena inkhaikhin reng tur khan ka zo dawnin ka hre lo bawk,” a ti.