Mizoram police te hi kawng tam takah an chhuanawm tak zet a. An police nihna ngawt piah lamah mizo hnam thinlung pu a, ram leh hnam tana inpekna pawh an nei takzet a. A nihna takah chuan kan police te hi state police chhuanawm tak an ni. Ram tana an beihna tam tak hi mipuite hriat ve vak chi loh pawh tam tak a awm thin. A ruk tak chuan mipuite pawh hian kan thinlungin kan chhuang a. Force leh force inbeihnaah phei chuan tumah hian an hneh kan ring phal lo hial ang.
Hmingthatna tam tak an khum thin a. An hotute pawh hian an chhuang hle thin. Amaherawh chu mi tam tak kalkhawm an ni a. Mipui an thuhmun fo thei lo tihte leh mihring chu famkim lo kan ni a. Tihsual leh rilrua thil tha ber ngaihtuah lova, engemaw kan tana duhamna han neih mai chin changte pawh a awm leh thin. Kan police teah pawh hian mahni hlawkna ngaihtuah a, mahni duty loh dana khawsak chang a awm ve thin bawk. Hetiang hi a department pum mualphonaah a chang thin.
Hmanni a khawthlang lama dan lova kuhva phur man ta lova, mipuiin an man a, an hal ta mai pawh khan kan police te a ti mualpho nasa em em a. Mipuiin rinhlelh chana chang a, gate duty an enthla a, an rinhlelh ang ngeia thil a thlen phei kha chuan hun kal tawha an tih dik loh thin zia a lang chiang hle a. Kan police te hi an in en let a ngai takzet mai.
Kan police ten dan lekkawh a, thil dik lo an man loh a, mipuiin an man a, kut an thlak kha a tha lo takzet a. Mipuiin dan an kenkawhna ramah kan chang mai ang tih a hlauhawm hle tawh mai. Police khan man se engmah mipui buaina tur a awm lova, an kuta dan an lekkawh a ngai lo tur. Mahse, an duty an tih loh avanga thil thleng hi a pawizia leh hun lo la awm tura kan ram tan a pawi thui theihzia ngaihtuah a, he thilah hian an hotute hian na taka action an lak a ngai tih pawh hi hre nawn leh teh se. Thil dik lo leh tha lo hi chu a zep ruk tak tak theih ngai loh a, a lan chhuah hun a lo awm leh tho zel si a ni.