Aizawl: Nimin kha MNF Founder President Laldenga thih champha vawi 33-na a ni a, zing dar 7 khan MNF party hotuten Treasury Square, Aizawl-a a thlanah zahna chibai bukin pangpar an dah.
He hunah MNF President, Chief Minister Zoramthanga chuan thu sawiin, “Pu Denga pawh khan kum 1961-a hnam thuthlung an tan a, movement an kalpui lai khan hma lam hun a hmu chiang bik lo. Keini pawh chu tho chu kan ni. Amaherawhchu, rinna chu vawng tlatin a thi ta a. Keini pawh chutiang chuan kan thih ve a ngai,” a ti.
“He ram min petu, he hnam siamtu leh min kaihruaitu hian a mipuite hi kan thluthlung angin Pathian tan a ni a, a dawtah kan ram tan. Pathian leh kan ram tan kan ti. Chuvangin, kan hnam movement hi Pathian tan a ni,” tiin, chu thuthlung chu a rei tulh tulh a, a pawimawh tulh tulh tih a sawi.
MNF-in kum 62 chuang harsatna leh lungngaihna a lo hneh tawh tih sawiin, “Pathian tanpuinain, a duh zawng ti turin a hneh zel ang tih rin tlat ngamna hi kan chakna a ni. He rinna vawng tlata kan awm hi kan felnaah ruat a ni,” tiin Laldenga chi tuh chu rinnaa vuantuah a lo tiak zel tih a sawi.
MNF Vice President Lalthlengliana kaihhruai Laldenga thlana inkhawmah hian Laldenga (L) fanu, Dr. Lalrinzuali pawhin a pan inremna siam hun lai khan a duh anga thil a thlen lohzia a hrilh thin thu leh a tum ang leh a duh ang hmang hman lova a boralsan thu a sawi.
Vice President Vanlalzawma leh Lalthlengliana te, Treasurer K.Vanlalauva, MNF National Core Committee member, Laldenga nupui Biakdiki leh minister/ MLA bakah AMC Dy. Mayor/Corporator zahna pangpar an dah a ni.