Mizoram Pradesh Congress Committee (MPCC) Campaign Committee huaihawtin nimin khan Lal Thanhawla Auditorium-ah mi thar lawm luh inkhawm an buatsaih a. Congress President Lalsawt-a’n mi 100 chuang an party-ah a lawm lut.
MPCC Vice President Lal Thanzara kaihhruai lawm luh inlawma Congress party zawm thar langsar zual zingah R. Lalrinmawia, CEC & Chairman, Sports Sub Committee, Central YMA, Sunrise Hardware, Ramhlun North; Vanlalruata Chenkual, College Veng, Joint Director (Rtd), Horticulture Deptt. leh Lalthanglura, Research Officer, Eco & Statistics Deptt,, (Rtd) Tlangnuam Vengthar te an tel.
R Lalrinmawia hi kumin MLA inthlan lo awm turah Aizawl North II biala INC ticket-a ding tura rin a ni a. Bialtu MLA ni mek, Dr Vanlalthlana nena inkhing tura rin niin, anni pahnih hi Ramhlun North veng mi ve ve an ni.
Lawm luh inkhawmah Congress president chuan mi tha tak tak, ram siam that tum Pathianin a pe mek zel tih sawiin, “Anni lo pawh hi ram siam that duh leh Mizoram tana sorkar tha siam tum an lo kal leh dawn a. Tihfuh tum lova Zorama khawvartir tura lo lut, nihna leh ropuina duha lo lut ni lo, hnathawk tura lo lut an ni,” a ti.
Mizoram chhunga hnam hrang hrang leh sakhua a him theih nan BJP sorkarna paih a ngai tih sawiin Lalsawta chuan, “MPCC hruaitute leh AICC hruaitute inkawmnaah Mizoramah Congress party-in sorkar tha, a ram chhunga hnam leh sakhua humhimtu tur, BJP chakna leh pawisa it ve lo sorkar siam a tul a, chumi atan chuan India leh khawvel hmun hrang hranga thalaite ngaihsan rawn, Rahul Gandhi pawh Mizoramah a lo kal thuai dawn,” tiin, Congress party chuan Zoram mipuite tan sorkar tha an tiam a, ram aia mahni indah hmasa politician an hnawl dawn a, Mizoram mipui pawhin hetiang mite hi hnawl turin a ngen, a ti.
He hunah hian MPCC Media Chairman Dr. Lallianchhunga’n Manipur buaina chungchang resolution a put luh chu pawm a ni bawk.