North Korea hruaitu, Kim Jong-un chuan kum nga chhunga an ram sum leh pai leh ei leh bar dinhmun chawi kânna tura ruahmanna, five-year economic plan chu kawng hrang hrangah a hlawhchham deuh vek tih a sawi.
Nilainia a kaihhruai rorel lai, Workers’ Party-in an neih khât tak inhmuh khawmna lian, congress an neih a hawnnaah a sawi a. Congress hi an party chanchinah an vawi riat neihna chauh a ni.
Kim-an a hlawhchhamna a pawm leh a sawi chhuak hi thil thleng khât tak a ni a, chutih rual chuan a chin than a ni zui thei niin an ram chanchin hre deuhte chuan an sawi bawk.
TV-a an khawpui, Pyongyang-a an party intawh khawm neih tihlanaah chuan conference hall lian takah an ram hmun hrang hranga an party aiawhte an khat vek a hmai tuam an awm lo va. Hall chhunga Kim-a a luh laiin zahna chibai an lo buk rual thut bawk.
Thu a sawinaah Kim-a chuan kum 2016-a bul tan, five-year strategy chu kil (sector) hrang hrangah hlawhtlinpuina a awm mang lo tih a sawi a, tihsual awmte a pawm tih chiang takin a thusawi a lang.
Mahni kea din tum tura fuihin an party worker-te chu coronavirus an beihna kawngah a fak a. North Korea-ah hian hri kai ngeia ngaih sang chuang awm tawh angin World Health Organization (WHO) chuan a ngai a, anmahni hian an la awm lo niin an sawi ve thung.
Kum tam tak chhunga an ram dinhmun a chhiat ber laia khai chhuah a tum dan erawh a thil sawiah hian sawi chianna a nei lo.
Tun tuma congress an neih hi Kim-a hian five-year economic plan thar puanna hun atana a hman erawh rin a ni.
Kim-an an party mite hmaa thu a sawi hi US president atana Joe Biden-a lak luh a nih hma chawlhkar hnih vel a la awmah a ni a, ani hian Donald Trump-a a thlak dawn a. Trump-a kha Kim-a nen hian an inhnai angreng hle a, Biden-a hian eng angin nge nuclear programme avanga US-in a hrekna chu a kalpui zui zel dawn tih chu ngaihven hlawh a ni mek.