New Zealand prime minister pawhin cluster bomb hman hi an ramin a duh lo tih a sawi a, Sunak-a ai mahin a tawng na a, tual chhung chanchinbute pawhin an chhuah chhawng.
Chris Hipkins-a hian hetiang ralthuam hi ‘nunrawng tak a ni a, pawisawi lote lakah nasa takin pawi a khawih a, a hnu zelah rei tak thleng a nghawng bawk’ niin a sawi a. White House hnenah pawh New Zealand chuan Ukraine indonaa cluster bomb hman a duh loh thu a hrilh niin a sawi.
Spanish Defence Minister Margarita Robles pawhin an ram chu Ukraine hnena hetiang hmanrua leh bomb hman tur pek tur ‘duh lo tlat’ a nih thu thuthar lakhawmtute hnenah a sawi.
“Ukraine humhim nan eng cluster bomb mah kan pawm thei lo va, cluster bomb nena thil chin fel theih dan hi a awmin kan hre lo,” tiin a sawi a ni.
Canadian sorkar pawhin hetiang bomb-in hna a thawh theih dan chu an buaipui hle tih an sawi a, kum tam tak chhung puak lova awm chu a hnuah naupangten an tipuak palh leh thin chu tha lo an ti tih an sawi.
Canada chu cluster bomb hman do tlattu a nih thu leh Convention on Cluster Munitions zawmtu a nih reng thu an sawi a. “He convention hnuaia kan dinna hi a ngai reng dawn a ni,” tiin an sawi.
US, Ukraine leh Russia te hi he convention-a hming ziak ve lo an ni a, Moscow leh Kyiv hian tuna an indo meknaah hian cluster bomb an lo hmang ve ve tawh bawk.
Hetih lai hian he inremnaa hming ziak, Germany chuan Ukraine hnenah cluster bomb hi la thawn ve lo mah se American dinna chu an hriat thiampui tih an sawi.
“Kan thian, US hian awlsam leh ngaihtuahna fim hmang miah lovin hetiang ralthuam hi a thawn ngawt lo vang,” tiin German sorkar thupuangtu, Steffen Hebestreit chuan Berlin-a thuthar lakhawmtuten an kawmnaah a sawi.