Mizoram Pradesh Youth Congress Committee (MPYCC) hruaituten nimin khan Aizawl New Market building, Aizawl City Centre Annexe sak that meka hna thawh dan an enfiah.
MPYCC hi an president Laltawnliana hoin tun hnaia social media-a building sak hna thawk tute’n ruah sur laia tuihawk tling kara tie-beam an chhun lai video darh chu bawhzuiin an en fiah a. Building sakna tur sum hi Congress party sorkar laia dah fel vek a nih thu sawiin Laltawnliana chuan, “Vawiin thlenga sak zawh a la ni lo leh hnathawh tawh chin a la tlem lutuk hi a mak kan tiin, a pawi kan ti takzet a ni,” a ti.
Hnathawh a muan thu te, hnathawh that loh thu leh building sak pum tawhte pawh tui pek a nih ngai miah loh thute an dawng thin chu pawi a tih thu sawiin, “Nimin lawkah pawh hnathawh tha lo tak social media-ah a darh a. Kan ram ro tura Congress party in kan tih, hetiang mai maia sak a ni hi na kan ti,” tiin, building sak mek hi mangkhawng lianpui a nih lohna turin contractor te pawhin an hna tha leh uluk zawka thawk tawh tura an ngen bakah, MNF sorkar pawhin ngai pawimawh zual turin a ngen.
MPYCC hruaitute sawi danin, Aizawl New Market building sak that hna hi October 2, 2018 atanga tan niin, kum thum chhunga zawh tura tih a ni a. A sak nana sum ruahman zat chu cheng nuai 3641.59 a ni a, Lusai Engineering Private Ltd. Ramhlun, Aizawl in a sak hna an thawk a. Kum li chuang he building hi sak a nih tawh hnuah pawh hna hi za-a 50 pawh an la thawk zo lo a ni.
Aizawl New Market-ah hian sumdawng pawl (Association) hrang hrang 65 awmin, New Market behchhan hian chhungkaw 2240 chuang eizawng an awm a, he’ng chhungkua te hian an eizawnna hmun thiah darh sak an nih avanga an harsatna tawh mek a namai lo hle a, ngaihthah a, ngawih bo pui mai emaw, hriat loh der a hun tawh lo takzet thu an sawi bawk.