- Rempuia R. Lutmang
Thawh hun a awm a, mut hun a awm; thawh hun a awm a, chawlh hun a awm; kal hun a awm a, hawn hun a awm; mahse, kal hun leh haw hun hi kan bawhpelh nasa thei hle.
Post office te, school te, bank te, hospital te ni lo, sawrkar office pangngaia thawkte hi an tan hun pangngaia thleng thin mi fel tak tak awm mah se, thleng hman ngai lo hi a tam zawk an ni mai thei.
“Tunlai chu kal hma ziah a ngai a,” an tih hian han zawt i la, “Timing an endik lai a nia, a hun takah thlen a ngai,” an ti mai ang. An endik loh laia an thlen hun dik tak tur kha endik lai chauha vawn an tum tihna a ni. An hna thawh tan hun dik taka an thlen chauh khan kal hma an inti a, endiktu an awm loh phei chuan eng tik hun chiah hi nge kal hun pangngai an tih ang aw.
An haw hun ni loin an timing tawp lam awm thleng hi an tam leh vak lo bawk thin an ti, kan hre ve chiah lo a. Mi tha leh fel tak tak, timing pel zana awm thin an awm tho ang. Timing hi hna thawh hun chhung tur a ni, thlen hun emaw, haw hun emaw ni loin. Chutiang chu ni mah se, kal hun emaw, ban hun emaw ti mai an tam.
Entirna lo hmang ta i la, dar 10-a hna thawk tan tur an nih chuan dar 9:30-ah emaw, 9:45 velah emaw office thlen âwm tak a ni, chu chu endik lai a ni emaw, endik loh lai a ni emaw, tih dan tur pangngai chu a ni. Dar 4 thleng hna thawh tur a nih chuan dar 4:15 emaw, dar 4:30 emaw hi office chhuahsan hman hun a ni chauh thei. Eng emaw neuh neuh avanga haw tlat a awm thei bawk ang.
Hun vawng dik ngai lo, “A kal lam kan hma thei si lo a, a haw lam tal kan hma loh chuan,” titu hlir maite kha kohhrana a kûl a taia tang, Pathian thu sawi uar uar, a tuipui pui an ni leh thung si. Hetia han tih hian pa pakhat chuan, “Office kal ngai lo an ni a, an sawi ve mai mai a ni. Han kal ve chiah se hun an vawng dik reng peih bik lo ang,” a ti a, a dik ngawt ang. Aia senior zawkte’n an vawn dik peih miau loh chuan entawn awl deuh tur a ni.
Aia lalte’n min endika min hrem dawn te a nih ngawt loh chuan, tawngkamah “Pathian zara kan hna hmuh” an ti mathlawn loin, Pathian min pek kan hna hi thawh tan hunah kan thleng hman lo a, ban hun kan ban thleng thei meuh lo a nih ber hi. Chung chu kohhran tina a puipa, kohhran khaidingtu, khawtlang enkawltu leh thlamuantu, Mizo Kristiante nu leh pate an ni a, kum 60 pelh hnu daiha kum 60 tlinga retire chauh thinte an ni.