US-in Ukraine hnena cluster bomb pek a tum chu Washington ram hrang hrangten tha an ti lo hlawm hle.
Zirtawpni khan US hian hmanraw sawi hlawh tak hi Ukraine hnena pek a tum thu a tichiang a, President Joe Biden-a chuan ‘thutlukna siam harsa tak’ a nih thu a sawi.
US chet tum dan chungchangah hian UK, Canada, New Zealand leh Spain te chuan hetiang ralthuam hman hi an duh loh thu an sawi hlawm.
Cluster bomb an tih hi civil mite tawrhna thlentu lian a nih avangin ram 100 chuangin hman an khap.
Heng bomb-te hian bomb tenau tete a pai teuh a, chu chu a tlakna hmun atanga zau takah a darh thei thin a ni.
A huam chin a zauh piah lamah hian puak nghal mai lo a tam thin hle a. Puak si lo, la puak thei siin kum tam tak a dam thei a, rin loh leh hriat loh karah a puahin a bul hnaia mite tan a pawi nawn leh thei a ni.
Biden-a hian Zirtawpnia CNN-in a kawmnaah hetiang bomb a pek chhuah tur hi sipai mamawh $ maktaduai 800 man hu a pek tur zinga mi a nih thu leh an thawhpui ramte pawh an rawn thu a sawi.
President hian hetiang pe tur hian an inngaihtuah rei hle tih a sawi a; mahse, Ukrainian-ten hmanrua an tlakchham tawh si avangin an ‘aw’ ta niin a sawi.
Thutlukna an siam rual hian mihring dikna chanvo humhalhtu pawlin an sawisel nghal a. Amnesty International chuan hetiang hmanrua hi ‘civil mite tan thlanmual, buaina tawp hnu pawha rei tak daih’ a nih thu an sawi.
US National Security Adviser Jake Sullivan chuan Ukraine-a an thawn tur American cluster bomb-te hi Russia-in an hman mek aiin a tha lo niin a sawi.
Inrinniah khan khawthlang rama an tanpuite chuan US thutlukna siam hi an hnial.
UK Prime Minister Rishi Sunak chuan an ram chu hetiang hmanraw siam leh hmang duh lo ram 123-ten Convention on Cluster Munitions ziaktu zingah an tel thu a sawi.
Sunak-a hian he thu hi President Biden-a nena an inbiak hma lawka a sawi a ni a, president hi Pathianni chawhnu khan UK-ah tumin Lithuania-a Nato summit-ah a tel nghal dawn a ni.