Aizawl: Taitesena Group YMA chuan tun hnaia kuhva phurh lirthei pahnih en dik lova police-ten an tlangtir chungchangah thil dik lo a awm ngei nia an hriat thu sawiin, tun hnuah hetiang thil hi thleng tawh lo se an duh tih an sawi.
Thuchhuah an siamah Taitesena Group YMA chuan police checkgate/check post a awm reng chung pawha dan phal loh foreign kuhna phurtu te’n checkgate an paltlang thei reng chu pawi an tih thu tar langin, “Dan leh hrai kengkawhtute mipui thinlunga an hlutna lo tlahniam zel hian nghawng tha lo a neih zel pawh a hlauhawm tak zet a ni,” tiin, hetiang hi thleng nawn tawh lo se an duh tak zet thu leh an ngennate zah sak turin kuhva tawlhtute leh thuneitute an ngen.
Taitesena Group YMA chuan dan lo a ram dang kuhva tawlh luh chungchangah sorkar laipui leh Mizoram sorkarin khapna thupek a chhuah fo hnu leh, Hachhek Bial Kuhva Chingtu Pawl (HBKCP) leh Jt. Group YMA (Taitesena Group leh Langkaih YMA) te pawhin vawi eng emaw zat ram dang kuhva phur tawh lo tura ngenna thuchhuah an siam tawh chung pawh a, Hachhek tlangdunga tun thlenga dan lo a kuhva tawlh ruk man tur a la awm reng hi pawi an tih thu an sawi a. Heng ram dang kuhva hian Hachhek huamchhunga kuhva chingtute tan a hralhna kawngah harsatna tam tak a thlen mek niin an sawi.
HBKCP te’n nikum lama kuhva phur lirthei an manah kuhva tawlhruk phenah dan phal loh thil (smuggling) lian zawk tam tak a inphum ru tih pawh chiang taka an hmuhchhuah thu an sawi a. HBKCP in tha leh tui tam tak seng leh thianghlim taka an tharchhuah kuhva hralh kawnga harsatna siamtu ramdang kuhva tawlhruk doa hma an lakna an thlawp thu Taitesena Group YMA chuan an thuchhuahah an tar lang bawk.